Գերմանիայի Բունդեսթագի «Ազատ դեմոկրատներ» խմբակցության պատգամավոր, գերմանա-հայկական ֆորումի նախագահ Թիլ Մանսմանն ընդգծում է Հայաստանի և Գերմանիայի միջև երկկողմ լավ հարաբերությունները։ «Արմենպրես»-ին տված հարցազրույցում Թիլ Մանսմանը կարծիք է հայտնել, որ Հայաստանը բարդ իրադրության մեջ է, քանի որ աշխարհաքաղաքական ներկա զարգացումների համատեքստում բախվում է շատ սթրեսային գործոնների։ «Գերմանիան աջակցում է Հայաստանին, քանի որ երկու երկրները ընդհանուր արժեքներ են դավանում»,- ասել է Մանսմանը։
Անդրադառնալով հարցին, թե Հայաստանի և Գերմանիայի հարաբերությունների զարգացման ինչպիսի ներուժ է տեսնում՝ Թիլ Մանսմանն ասել է․ «Հայաստանում կրթության և մշակույթի ոլորտում Գերմանիայի քաղաքականությունը ուղղված է թե դպրոցներում, թե համալսարաններում գերմաներենի՝ որպես օտար լեզվի տարածմանը: Ակադեմիական փոխանակման գերմանական ծառայությունը և Արտասահմանյան դպրոցների կենտրոնական գործակալության դաշնային գրասենյակը Հայաստանում գերմանացի աշխատակիցների անձնակազմ ունեն: 2017 թվականի սկզբին Երևանում Գյոթե կենտրոն է բացվել, նույն շենքում է նաև Լեզվի ուսուցման կենտրոնը: Գերմանական և հայկական բուհերի միջև կան բազմաթիվ համագործակցության համաձայնագրեր: Բացի այդ, Բեռլինում ԹՈՒՄՈ կենտրոն կա, որի նպատակը թվայնացման և ծրագրային ապահովման բացարձակապես անվճար ուսուցումն է: Ֆրիդրի Էբերտ, Կոնրադ Ադենաուեր քաղաքական հիմնադրամները, Ֆրիդրիխ Նաումանի և Հենրիխ Բյոլի հիմնադրամները, ինչպես նաև Մեծահասակների կրթության գերմանական ասոցիացիան և Միջազգային իրավական համագործակցության գերմանական ֆոնդը գրասենյակներ ունեն Երևանում, որոնք համալրված են տեղացի աշխատակիցներով»:
Հարցին, թե որպես գերմանա-հայկական ֆորումի նախագահ՝ ինչպե՞ս է գնահատում ֆորումի դերը երկու երկրների միջև հարաբերությունների ամրապնդման գործում, Մանսմանն նշել է, որ փոխգործակցության ներկա ճանապարհը նկատելիորեն դրական է: «Ես շարունակում եմ նվիրված մնալ հայ-գերմանական բարեկամությանը»,- նշել է նա:
