News Georgia-ի փոխանցմամբ՝ Վրաստանի նախագահ Միխեիլ Սաակաշվիլին Թբիլիսիում գտնվող նախագահական նստավայրում այսօր հանդիպել է երկօրյա այցով Վրաստան ժամանած Եվրոպայում ՆԱՏՕ-ի միացյալ ուժերի հրամանատար, ծովակալ Ջեյմս Ստավրիդիսի հետ։
Վրաստանի նախագահական ապարատի տարածած հաղորդագրության մեջ նշված է. «Հանդիպման ժամանակ կողմերը քննարկել են Վրաստանի ու ՆԱՏՕ-ի փոխհարաբերությունների հեռանկարները և Աֆղանստանում ընթացող խաղաղապահ գործողություններում Վրաստանի մասնակցության հարցը։ Ջեյմս Ստավրիդիսն անձամբ է շնորհակալություն հայտնել Վրաստանի նախագահին՝ վրացի զինծառայողների ցուցաբերած քաջության համար»։
Նշվում է, որ Սաակաշվիլիի հետ հանդիպումից առաջ Ստավրիդիսը հանդիպել է Վրաստանի պաշտպանության նախարար Բաչո Ախալայայի հետ և նրան շնորհակալություն հայտնել Աֆղանստանում Միջազգային անվտանգության աջակցության ուժերի (ISAF) կազմում ՆԱՏՕ-ի անդամ չհանդիսացող Վրաստանի ներգրավվածության համար։
Հիշեցնենք, որ Վրաստանն Աֆղանստանում ISAF-ի գործողություններում ներգրավվել է 2009 թվականից։ Ներկայումս այնտեղ են գտնվում 900-950 վրացի խաղաղապահներ։ Վերջիններիս դասակը (175 զինվոր ու սպա) տեղակայված է Քաբուլ քաղաքում՝ Ֆրանսիայի պատասխանատվության գոտում, իսկ գումարտակը (749 մարդ)՝ Հիլմենդ նահանգում՝ ԱՄՆ պատասխանատվության գոտում։
2012 թվականին Աֆղանստանում գտնվող վրացի խաղաղապահների թիվը հասնելու է 1500-ի, որով և Վրաստանը պետք է դառնա ՆԱՏՕ-ի անդամ չհանդիսացող երկրներից Աֆղանստանում ամենամեծ զինվորական զորախումբն ունեցող երկիրը։
2011 թվականի հունիսի վերջի դրությամբ Աֆղանստանում զոհվել են վրացի 9 զինծառայողներ։