News Georgia-ի փոխանցմամբ՝ Վրաստանի նախագահ Միխեիլ Սաակաշվիլին մասնակցել է Բաթումիի առաջին սահադաշտի բացման արարողակարգին։ Այն համապատասխանում է օլիմպիական չափորոշիչներին։
Բացման արարողակարգի ժամանակ Սաակաշվիլին հայտարարել է. «Երկու տարի առաջ ես խոստացա վրացի հայտնի գեղասահորդուհի Էլենե Գեդևանիշվիլիին, որ մենք Վրաստանում ունենալու ենք օլիմպիական չափորոշիչներին համապատասխանող սահադաշտ։ Դա նրա նախաձեռնությունն է, նա միշտ խնդրում էր այդ մասին։ Հետևաբար, այդ սահադաշտը պետք է կրի նրա անունը։
Սահադաշտերը շատ կարևոր են երեխաների առողջության համար, ինչի համար էլ մենք դրանցից կառուցելու ենք նաև Քութայիսիում ու Թբիլիսիի մի շարք վայրերում։ Ներկայումս Բաթումիում գործում է երկու սահադաշտ, իսկ Զուգդիդիում՝ մեկը։
Բաթումիում տարբեր տիպի նոր օբյեկտների բացումը կնպաստի զբոսաշրջության զարգացմանը։ Այստեղ արդեն բացվել են Մշակույթի ու արվեստի կենտրոնը, դելֆինարիումը, սահադաշտը։ Հաջորդ տարի Բաթումի կժամանեն ավելի շատ զբոսաշրջիկներ, որոնք այստեղ կգտնեն իրենց համար բավական հետաքրքիր բաներ։ Զբոսաշրջիկների քանակի ավելացումն իր հերթին հանգեցնում է նոր աշխատատեղերի ստեղծմանն ու եկամուտների ավելացմանը։
Այս տարի Բաթումիում մեկնարկելու է նաև ժամանակակից մարզադաշտի կառուցումը, որը տեղավորելու է 30,000 հանդիսական և հանդիսանալու է ոչ միայն Վրաստանի, այլև Կովկասի լավագույն մարզադաշտը»։
Հիշեցնենք, որ Սաակաշվիլիի կանխատեսումներով՝ 2015 թվականին Վրաստան է այցելելու 7-8 միլիոն զբոսաշրջիկ։
