Ի պատասխան Սինայում սպանված ոստիկանների, Եգիպտոսը որոշել է հետ կանչել Իսրայելում իր դեսպանին: Այս մասին հայտնում է Associated Press գործակալությունը: Ինչպես ասվում է Եգիպտոսի կառավարության տարածած հայտարարության մեջ, նման որոշումը կայացվել է այն բանի համար, որ հինգշաբթի իսրայելաեգիպտական սահմանի վրա` Սինայում, սպանվել են 5 եգիպտացի ոստիկաններ: Եգիպտացիները պնդում են, որ ոստիկանները զոհվել են իսրայելական ռազմական ուղղաթիռի հարձակման հետևանքով: Իսրայելը խոստացել է հետաքննել այս դեպքը:
Հիշեցնեմ, որ երեկ Եգիպտոսում Իսրայելի դիվանագիտական ներկայացուցչության շենքի մոտ մոտ 200 ցուցարարներ պահանջում էին երկրից վտարել Իսրայելի ներկայացուցչին:
Իրավիճակը տարածաշրջանում շարունակվում է լարվել: Ինչպես տեղեկացրել էինք նախկինում, Իսրայելում օրեր առաջ իրականացված 3 ահաբեկչությունների հետևանքով Իսրայելը հարձակում է գործել Գազայի վրա` սպանելով առնվազն 14 պաղեստինցու, որոնց մեղադրում էր ահաբեկչությունները կազմակերպելու մեջ: Ի պատասխան Իսրայելական ռազմաօդային ուժերի հարձակման՝ Գազայից պաղեստինցիները Իսրայելի տարածքի վրա մոտ 30 հրթիռ են նետել:
