ԱՄՆ-ի նախագահ Ջո Բայդենի հետ խոսակցության ընթացքում ՉԺՀ-ի նախագահ Սի Ծինպինի հայտարարությունն այն մասին, թե Պեկինը վճռական միջոցների կդիմի, եթե Տայվանի անջատողական ուժերն անցնեն «կարմիր գիծը», անկասկած նշանակում Է, որ Պեկինը կարող Է կղզին մայր ցամաքի հետ միավորել ռազմական ճանապարհով: Այդ մասին, ՌԻԱ Նովոստիին հայտարարել Է չինացի հայտնի քաղաքագետ, Kunlunce վերլուծական կենտրոնի ավագ գիտաշխատող Սի Մանանը:
ՉԺՀ-ի եւ ԱՄՆ-ի ղեկավարների վիրտուալ գագաթնաժողովը տեղի Է ունեցել նոյեմբերի 16-ի առավոտյան եւ շարունակվել Է ավելի քան երեք ժամ. ղեկավարները քննարկել են երկու երկրների ներկայիս իրադրությունը եւ հարաբերությունների հետագա զարգացումը, իրենց դիրքորոշումներն են հայտնել Տայվանի հարցի եւ առեւտրատնտեսական համագործակցության վերաբերյալ, ինչպես նաեւ կարծիքներ փոխանակել միջազգային խնդիրների շուրջ:
Սի Մանանը հիշեցրել Է, որ Բայդենի հետ ունեցած խոսակցության ժամանակ Սի Ծինպինը հայտարարել Է Պեկինի համբերատարության եւ ողջ ուժով հատկապես խաղաղ վերամիավորման հեռանկարներին հասնելու պատրաստակամության մասին, բայց եթե Տայվանի անկախության օգտին հանդես եկող անջատողականներն անցնեն «կարմիր գիծը», Պեկինը «վճռական միջոցների» կդիմի:
«Առանց որեւԷ կասկածի, վճռական միջոցները ռազմական ուժով երկրի միավորման հոմանիշն Է»,-նշել Է վերլուծաբանը: Նա նաեւ նշել Է, որ Բայդենի հայտարարությունն այն մասին, թե ԱՄՆ-ը չի ձգտում փոխել Չինաստանի համակարգը, ամրապնդել դաշնակցային հարաբերությունները Չինաստանի դեմ եւ հակամարտել ՉԺՀ-ի հետ, խոսում Է Պեկինի նկատմամբ իր դիրքորոշման անփոփոխ լինելու մասին:
