Այսօր ՀՀ ֆինանսների նախարար Վաչե Գաբրիելյանն ընդունել է Գերմանիայի պետքարտուղար Յորգ Ասմուսենին: Պատվիրակության կազմում էին նաև Գերմանիայի վերակառուցման և զարգացման բանկի (KfW) գործադիր խորհրդի անդամ Նորբերտ Կլոպենբուրգը, բանկի փոխնախագահ Եվա Վիտտը, ՀՀ-ում ԳԴՀ արտակարգ և լիազոր դեսպան Հանս-Յոխեն Շմիդտը և այլոք:
Հանդիպման ընթացքում քննարկվել են հայ-գերմանական ֆինանսական համագործակցության շրջանակներում իրականացվող համատեղ ծրագրերի ընթացքին առնչվող հարցեր:
ՀՀ և Գերմանիայի վերակառուցման և զարգացման բանկի միջև կնքվեց նաև ֆինանսավորման համաձայնագիր, որի շրջանակներում կիրականացվի Վանաձոր քաղաքի և հարակից այլ համայնքների կոշտ կենցաղային թափոնների կառավարման փորձագիտական ուսումնասիրություն:
Համաձայնագիրը ստորագրել են ՀՀ ֆինանսների նախարար Վաչե Գաբրիելյանը, ՀՀ տարածքային կառավարման նախարարի առաջին տեղակալ Վաչե Տերտերյանը, KfW բանկի փոխնախագահ Եվա Վիտտը և բանկի գործադիր խորհրդի անդամ Նորբերտ Կլոպենբուրգը:
Ուսումնասիրության շրջանակներում կկատարվի համայնքներում իրականացվող աղբահանության ծառայության ներկայիս իրավիճակի գնահատում, կներկայացվեն ծառայության բարելավմանն ուղղված միջոցառումների ցանկը և վերջինիս իրականացման հետ կապված ֆինանսական գնահատականը:
Բացի այդ, կհստակեցվեն գործող աղբավայրի փակման և Եվրամիության նորմերին համապատասխան նոր սանիտարական աղբավայրի տեղանքի ընտրության և կառուցման համար անհրաժեշտ միջոցառումները, թափոնների վերամշակման հնարավորությունները և դրանց ֆինանսական հաշվարկները:
Փորձագիտական ուսումնասիրությունը կտևի մոտ 10 ամիս, դրամաշնորհի չափը կազմում է 650 հազար եվրո:
