Նախօրեին ԱԺ-ում վարչապետ Նիկոլ Փաշինյանը հայտարարեց, որ Զանգեզուրի պղնձամոլիբդենային կոմբինատի սեփականատերերից մեկն առաջարկել է Հայաստանում նոր պղնձաձուլարան և նոր ատոմակայան կառուցել, որի շուրջ բանակցություններ են ընթանում: Սա այն դեպքում, երբ «Գեոպրոմայնինգ»-ը, որը տարներ շարունակ ոսկի է կորզում Սոթքի հանքից, այդ համայնքում անգամ մի ճանապարհ չէր կառուցել: Այս խնդրի առնչությամբ, «Առաջին լրատվական»-ի հետ զրույցում բնապահպան-իրավաբան Նազելի Վարդանյանն ասաց. «Ես չգիտեմ, թե իրենք ինչ են պայմանավորվել: Այո, նախկինում Սոթք գյուղը, որ պետք է չգիտեմ ինչ ձևի բարեկարգված լիներ, որովհետև այդ հանքի վրա էր հիմնված, էլի նույն թշվառ վիճակում էր, նույն աղքատությունն էր: Ոչ մի ենթակառուցվածքներ չեն ստեղծել մարդկանց նորմալ բնակվելու համար: Հիմա որպեսզի հասկանանք, թե ինչ կլինի, պետք է իմանալ, թե ինչ պայմանավորվածություններ ունեն, ինչ երաշխիքներ ունեն: Նրանց նախկին գործունեությունն այդ երաշխիքները չի տալիս, հավատ չի ներշնչում:
Նույնն էլ Արարատում է, որտեղ իրենց գործարանն է: Բացի դրանից, որ ցիանիդային հարթակ են ստեղծել և ոսկի են կորզում, ոչ մի բան այդ մարզում չի արվել իրենց կողմից, ոչ մի սոցիալական կամ բնապահպանական ծրագրեր չեն իրականացրել: Մարդիկ տարիներ շարունակ բողոքել են դրա դեմ»;
Նրա խոսքով, մնացած պայմանավորվածությունների մասին ոչինչ չի կարող ասել, որովհետև այս գործարքները գաղտնի են արվում. «Դա ևս անթույլատրելի է, որովհետև թափանցիկ պետք է լինի, ինչի համար ստեղծված է բազմաշահառու խորհուրդ: Նախատեսված է, որ այդ գործընթացները լինեն թափանցիկ, հասանելի հանրությանը, հանրությունը մասնակցի որոշումների կայացմանը, պարզ լինեն իրական շահառուները: Այսօր, փաստորեն, իրական շահառուների փոփոխություն է տեղի ունենում և մենք այդպես էլ չենք հասկանում, թե իրականում ինչ է եղել: Գուցե հօգուտ հանրության է տեղի ունենում, բայց մենք չենք կարող գնահատական տալ, մինչև տեղեկատվությունը հասանելի չլինի»,-ընդգծեց բնապահպան-իրավաբանը:
Նույն խնդրի առնչությամբ, բնապահպան, աշխարհագրագետ Լևոն Գալստյանն ասաց. «Ես արդեն շատ վաղուց ոչ նախկինների, որ ներկաների որևէ ասած բանի շատ լուրջ չեմ վերաբերվում, որ կարող է դրա տակ լուրջ բան լինել: Դրա համար ցանկություն չունեմ մեկնաբանելու նրանց հայտարարությունները: Այնքան է վստահության մակարդակը զրոյից ցածր, որ ես անմասն կմնամ նրանց ասած որևէ բան մեկնաբանելուց, լինի «Գեոպրոմայնինգ»-ը, կամ մեկ ուրիշ բան:
Բոլորը զբաղված են իմիտացիայով, և այդ անուններով տնտեսվարողները, և նրանց տարբեր թույլտվություն տվողները կամ նրանց հետ պայմանավորվածությունների եկողները: Եթե հանկարծ իրենց ասածներից ինչ-որ բան էլ իրականություն դառնա, պատահաբար, բախտի բերմամբ կարող է լավ բան ստացվի»:
