«Կարծում եմ դեսպանը արտահայտել է այն կարծիքները, որոնք գոյություն ունեն արևմտյան մայրաքաղաքներում, առնվազն՝ Վաշինգտոնում և Փարիզում: Բոլորն այս փուլում հասկանում են, որ Արցախի ժողովրդի միակ երաշխիքը ռուսական խաղաղպահ առաքելությունն է, և որքան էլ տարաձայնություններ լինեն Մոսկվայի հետ այլ տարածաշրջաններում, այլ հարցերում, յաս հարցում մշտապես եղել է որոշակի համաձայնություն»,-այս մասին «Առաջին լրատվական»-ի հետ զրույցում ասաց քաղաքագետ Տիգրան Գրիգորյանը՝ Հայաստանում Միացյալ Նահանգների դեսպան Լին Թրեյսիի արցախյան հարցի ու հայ-ադրբեջանական հակամարտության վերաբերալ անդրադարձին: Հիշեցնենք, որ դեսպանը Հանրային հեռուստաընկերությանը տված հարցազրույցի ժամանակ կարևորել է Ռուսաստանի դերը պատերազմը դադարեցնելու գործում և նշել, որ ռուս խաղաղապահները այսօր էլ կարևոր դեր են կատարում Արցախում կայունությունը կառավարելու հարցում, սակայն ըստ դեսպանի, ապագայի տեսանկյունից գործող սուբյեկտները Հայաստանն ու Ադրբեջանն են և նրանք պետք է կայացնեն որոշում, ելնելով իրենց շահից և իրենց ինքնիշխանությունից:
Մեր զրուցակցի խոսքով՝ Արևմուտքում բոլոր պատասխանատու գործիչները, կառավարությունները հասկանում են, որ խաղաղապահ առաքելության չգոյության պայմաններում Արցախում հայ բնակչություն չի մնալու: «Ինչ վերաբերում է դեսպանի հայտարարության երկրորդ հատվածին, ապա փորձ է կատարվում ինչ-որ կերպ բալանսավորել ռուսական մենաշնորհը տարածաշրջանում: Այսինքն խոսքը գնում է այն մասին, որ բանակցությունները պետք է ընթանան ոչ թե նոր ստեղծված եռակողմ ձևաչափով, որտեղ Ռուսաստանը մրցավարի դեր է ստանձնել, այլ ԵԱՀԿ Մինսկի խմբի շրջանակներում»: