Աֆղանստանում իշխանությունը զավթած արմատական «Թալիբան» շարժման և Ազգային դիմադրության ճակատի ներկայացուցիչների միջև բանակցություններ են տեղի ունեցել: Այս մասին իր ֆեյսբուքյան էջում հայտնել է Աբդուլ Հաֆիզ Մանսուրը, որը ներկայացնում է թալիբների վերահսկողությունից դուրս գտնվող միակ նահանգի՝ հյուսիսային Փանջշիրի բանակցողների խումը:
«Բանակցություններն անցել են լավ մթնոլորտում: Սա առաջին դեպքն է, երբ երկու կողմերն ուղիղ երկխոսություն ունեցան: Կողմերը պայմանավորվեցին շարունակել խաղաղության մասին երկխոսությունը՝ միմյանց դիրքերի վրա զինված հարձակումներից խուսափելու համար»,-ասել է Մանսուրը, ով ավելի վաղ մասնակցել է միջաֆղանական խորհրդակցություններին`որպես Աֆղանստանի կառավարության պատվիրակության անդամ:
Օրերս աֆղանական Tolo news հեռուստաալիքը հայտնել էր, որ թալիբների պատվիրակությունը բանակցությունների է գնացել Փանջշիրի ներկայացուցիչների հետ, ովքեր չեն ճանաչել Աֆղանստանում թալիբների կողմից իշխանության բռնազավթումը: Ըստ աղբյուրների, արմատականների ներկայացուցիչները պետք է համոզեն Ահմադ Մասուդին ՝ հայտնի դաշտային հրամանատար Ահմադ Շահ Մասուդի որդուն, ով ղեկավարել է դիմադրությունը Փանջշիրում, երկխոսության միջոցով լուծել կողմերի միջև եղած տարաձայնությունները:
Ավելի վաղ, սակայն, ՏԱՍՍ-ի աղբյուրը տեղեկացրել էր, որ Մասուդը մերժել է թալիբների պատվիրակության առաջարկները ստեղծված իրավիճակի խաղաղ կարգավորման համար ՝ դրանք համարելով անընդունելի:
