Մաքս Պլանկի ֆիզիկայի և բժշկության կենտրոնի և Իմունաթերապիայի գերմանական կենտրոնի մի խումբ գիտնականներ բացահայտել են, որ կորոնավիրուսը կարող է ազդել արյան բջիջների վրա: Այս մասին հաղորդում է РИА Новости գործակալությունը՝ հղում անելով Biophysical Journal-ում հրապարակված ուսումնասիրությանը:
Մասնագետներն ուսումնասիրել են սուր COVID-19 ունեցող 17 հիվանդների, 14 ապաքինվող և 24 առողջ մարդկանց (որոնք ծառայել են որպես հսկիչ խումբ) ավելի քան չորս միլիոն արյան բջիջներ: Արդյունքները ցույց են տվել, որ կորոնավիրուսը երկարաժամկետ հեռանկարում կարող է ազդել արյան կարմիր և սպիտակ բջիջների չափի և կոշտության վրա, ինչպես նաև հանգեցնում է որոշ բջիջների դեֆորմացման:
Այս փոփոխությունների մի մասը հիվանդանոցում նկատվել է հոսպիտալացումից յոթ ամիս անց: Գիտնականները եզրակացրել են, որ սա վարակի երկարաժամկետ հետևանքներից մեկն է, որը նաև բացատրում է COVID-19-ի ժամանակ անոթային խցանման և թոքային էմբոլիայի վտանգի աճը, իսկ մյուս կողմից՝ բջիջներում թթվածնի պակասը:
Գործակալությունը հիշեցնում է, որ ավելի վաղ Բիրմինգեմի համալսարանի գիտնականները պարզել էին, որ COVID-19-ը երբեմն հանգեցնում է Գիյեն-Բարեի համախտանիշի զարգացման: Հետազոտողների կարծիքով ՝ հակամարմինները, որոնք արտադրվում են վարակվելուց հետո, նման են նրանց, որոնք առաջացնում են սրտի և մաշկի աուտոիմուն հիվանդություններ:
