«Մինչև ջուրը հասնելը պետք չէ փողքերը քշտել», ի պատասխան Ռոբերտ Քոչարյանի հետ հնարավոր հետընտրական կոալիցիայի մասին հարցի պատասխանել է Սերժ Սարգսյանը, իսկ չբացառելու վերաբերյալ հարցերը թողել անպատասխան: Սարգսյանի այդ արձագանքը հատկանշական է մի փոքր դրվագի ֆոնին: Բանն այն է, որ մեկ-երկու օր առաջ Ռոբերտ Քոչարյանի հետ կոալիցիան չէր բացառել Սերժ Սարգսյանի առաջնորդած ուժի շտաբի պետ Դավիթ Հարությունյանը: Նրա հայտարարությունից երկու օր անց Սերժ Սարգսյանն անպատասխան չի թողնում հարցը և ասում է, որ ջուրը չմտած պետք չէ բոբիկանալ: Իսկ այլ հարցեր նա թողնում է անպատասխան: Այսինքն, Սերժ Սարգսյանը կարող էր անպատասխան թողնել նաև Ռոբերտ Քոչարյանի հետ կոալիցիայի հարցը, կամ առնվազն երկրորդեր շտաբի պետ Հարությունյանի «չբացառելը»:
Բայց «բացառել-չբացառելը» նա թողնում է անպատասխան, փոխարենը պատասխանում հետընտրական կոալիցիայի մասին հարցին այդպես՝ ջուրը չմտած պետք չէ «քշտել փողքերը»: Սա իհարկե հնարավոր է մեկնաբանել տարբեր կերպ, այդ թվում և հետևյալ տրամաբանությամբ, որ, նախ պետք է հասկանալ՝ իսկ գուցե Ռոբերտ Քոչարյա՞նն է ունենալու այդպիսի կոալիցիայի մասին մտածելու անհրաժեշտություն, հետևաբար հարցերը այդ առնչությամբ գուցե պետք է տալ Ռոբերտ Քոչարյանի՞ն: Թեև, երկրորդ նախագահը կարծես թե հենց այդ համատեքստում է պարբերաբար խոսել, որ Նիկոլ Փաշինյանի դեմ դաշինքը համարել է անարդյունավետ, որովհետև կա հետագա զարգացման վերաբերյալ պատկերացումների շոշափելի տարբերություն: Բայց, այստեղ կա մի նրբություն: Սերժ Սարգսյանը փաստորեն անդրադառնալով հարցին և բերելով հայտնի ժողովրդական խոսքը, որպես պատասխան, ըստ էության «ջրում» է շտաբի պետ Դավիթ Հարությունյանի պատասխանը՝ «չբացառելու» մասին: Իսկ այդ իրողությունը հատկանշական է մեկ այլ նրբերանգի ֆոնին՝ Կարեն Կարապետյանին պաշտոնի առաջարկը, որ արել է Ռոբերտ Քոչարյանը:
2008 թվականից հետո Կարեն Կարապետյանը հայտնվեց Սերժ Սարգսյանի քաղաքական շրջանակում, ինչպես և Դավիթ Հարությունյանը: Ավելի ուշ՝ մի քանի տարի անց, Սերժ Սարգսյանի իշխանության հանդեպ քննադատական վերաբերմունքով և անգամ շատ հաճախ ուղիղ և բաց դիմակայությամբ աչքի ընկնող Ռոբերտ Քոչարյանը հայտարարեց, որ 2007 թվականի ընտրությունից առաջ մի շարք պաշտոնյաների հորդորել է համալրել ՀՀԿ շարքերը՝ կուսակցությունն ուժեղացնելու համար: Բանն այն է, որ այդ պաշտոնյաներից էր նաև Դավիթ Հարությունյանը, որը թողեց արդարադատության նախարարի պաշտոնն ու ՀՀԿ ցուցակով դարձավ պատգամավոր: Հարությունյանն այդ պաշտոնյաների շարքու՞մ էր՝ որ Ռոբերտ Քոչարյանի հորդորով էր մտել ՀՀԿ, թե՞ ոչ: Ասելն իհարկե դժվար է, սակայն կասկածից վեր է, որ այդ հորդորի նպատակը ոչ թե ՀՀԿ-ն ուժեղացնելն էր, այլ ՀՀԿ-ում Ռոբերտ Քոչարյանի դիրքը կամ ազդեցությունը, հաշվի առնելով այն, որ կուսակցությունն անցնում էր Սերժ Սարգսյանի առաջնորդության ներքո: