Առողջապահության համաշխարհային կազմակերպության (ԱՀԿ) նախաձեռնած կորոնավիրուսի ծագման ուսումնասիրության նախորդ փուլը ԱՄՆ-ն համարում է «անբավարար» և կոչ է անում անցկացնել երկրորդ փուլ, որի ընթացքում պետք է նորից հետազոտություն իրականացվի, ներառյալ Չինաստանում։ Այս մասին ասվում է հինգշաբթի երեկոյան ՄԱԿ-ի՝ Ժնևի կենտրոնակայանում Միացյալ Նահանգների մշտական առաքելության կողմից տարածած հայտարարության մեջ:
«ԱՀԿ նախաձեռնած COVID-19 աղբյուրի ուսումնասիրության առաջին փուլը անբավարար և թերի էր: Մենք կոչ ենք անում անցկացնել ուսումնասիրության արագ, թափանցիկ, ապացույցների վրա հիմնված և փորձագետների կողմից ղեկավարվող երկրորդ փուլ՝ ներառյալ Չինաստանի ժողովրդական Հանրապետությունում»,- ասել է ԱՄՆ դեսպանը: «Չափազանց կարևոր է, որ Չինաստանը անկախ փորձագետներին ապահովի ամբողջական, նախնական տվյալների և նմուշների համապարփակ հասանելիությամբ՝ վիրուսի աղբյուրը և համաճարակի սկզբնական փուլերը հասկանալու համար»,- ավելացրել է նա:
ԱՄՆ-ի դեսպանը նաև հավելել է, որ իրենք գնահատում են «ԱՀԿ-ի հայտարարած հանձնառությունը» COVID-19-ի ծագման ուսումնասիրության երկրորդ փուլի գործընթացին անցնելը և «այդ մասին նորություններ են ակնկալում կազմակերպության գլխավոր տնօրենից:
Մայիսի 23-ին The Wall Street Journal-ը հայտարարություն էր տարածել՝ վկայակոչելով ամերիկյան հետախուզության տվյալները, որ Ուհանի վիրուսաբանության ինստիտուտի առնվազն երեք չինացի գիտնական 2019-ի նոյեմբերին լուրջ հիվանդացել է, ինչը կարող է վկայել նոր կորոնավիրուսի արհեստական ծագման տեսության մասին:
Ինչպես ավելի վաղ ՉԺՀ արտաքին գործերի նախարարության պաշտոնական ներկայացուցիչ Չժաո Լիջյանը հայտարարել էր հերթական ճեպազրույցում, ԶԼՄ-ներում տարածված հրապարակումներն այն մասին, որ ինստիտուտի մի քանի գիտնական 2019-ի նոյեմբերին բուժվում են հիվանդանոցում, չինական իշխանությունները դեռ այն ժամանակ են հերքել և հայտարարել անհայտ հիվանդության առաջացման մասին:
Մարտին փորձագետների միջազգային խումբը հրապարակել էր զեկույց՝ հունվար-փետրվար ամիսներին նոր կորոնավիրուսի ծագումը ուսումնասիրելու նպատակով Չինաստան կատարած ուղևորության մասին: Փորձագետները չէին կարող միանշանակ եզրակացության գալ: Ժնևում հրապարակված վերջին փաստաթղթի համաձայն՝ նրանք համարում են, որ կորոնավիրուսը փոխանցվել է կենդանիներից, իսկ հետո նաև տարածվել մարդկանց մեջ, իսկ ամենաքիչ հավանականը SARS-CoV-2-ի՝ լաբորատոր պայմաններում առաջացումն է: