Ժամանակակից ռուսական բանակը պետք է լինի կոմպակտ, բայց միևնույն ժամանակ արդյունավետություն ցուցաբերի։ ТАСС գործակալության փոխանցմամբ՝ այսպես է կարծում Ռուսաստանի նախագահ Վլադիմիր Պուտինը: Նրա կարծիքով՝ դրա համար հարկավոր է զարգացնել ռազմատրանսպորտային ավիացիան:
Պուտինի խոսքով՝ ՌԴ օդատիեզերական ուժերի ռազմատրանսպորտային ավիացիայի զարգացումը, դրա անխափան աշխատանքը և ավիապարկի բարձր պատրաստվածությունը պայմանավորում են զորքերի շարժունակությունը և նրանց արագ տեղափոխումը մեծ տարածության վրա։
«Մեր երկրի համար՝ իր հսկայական տարածքով, աշխարհում ամենամեծ տարածքով, դա առանձնահատուկ նշանակություն ունի նրա համար, որ մեր բանակը լինի կոմպակտ, ինչպես միշտ ասում ենք, բայց արդյունավետ։ Դա կարևոր է նաև հաջող դեսանտային գործողություններ իրականացնելու համար»,- ասել է ՌԴ ղեկավարը:
Պուտինը շեշտել է, որ ՌԴ զինված ուժերին ավելի շատ ռազմական տրանսպորտային ինքնաթիռներ և ուղղաթիռներ են պետք։ Նա նշել է, որ ավարտվում են ИЛ-112В թեթև տրանսպորտային ինքնաթիռների պետական փորձարկումները. ընթացիկ տարում նախատեսվում է երկու այդպիսի ինքնաթիռների մատակարարում։ Բացի դրանից՝ վերսկսվում է ИЛ-76 ինքնաթիռի արտադրությունը նոր տեխնոլոգիական հիմքով: Նաև մինչև տարեվերջ զորքերին են հանձնվելու հինգ Ил-76МД-90А սերիական ինքնաթիռներ։
Պուտինը խնդիր է դրել բանակն ու նավատորմը զինել բավարար քանակությամբ բարձր հեռահարության գերճշգրիտ զենքերի ժամանակակից տեսակներով: