Իսրայելի ռազմաօդային ուժերը Գազայի հատվածի տարածք չմտած ցամաքային ստորաբաժանումների աջակցությամբ ուրբաթ երեկոյան իրականացրել են անկլավում գտնվող արմատականների ռազմական թիրախների դեմ հակամարտության ներկայիս փուլի սկզբից ի վեր ամենամեծ գործողությունը, այս մասին օտարերկրյա լրագրողների համար ճեպազրույցում հայտարարել է Իսրայելի Պաշտպանության բանակի պաշտոնական ներկայացուցիչ Յոնաթան Կոնրիկուսը:
«Գիշերվա ընթացքում 160 ինքնաթիռ 40 րոպեի ընթացքում միաժամանակ գրոհել են 150 թիրախ: Դա հակամարտության սկզբից ի վեր ամենամեծ գործողությունն էր, որին մասնակցում էին ցամաքային ստորաբաժանումներ, որոնք նույնպես աշխատում էին նշանակված թիրախների վրա: Անցյալ գիշեր ոչ մի իսրայելցի զինվոր մուտք չի գործել Գազայի հատված: Հարձակման թիրախն է եղել Գազա քաղաքի տակ թունելների ցանցը, որն արմատականներն օգտագործում էին տեղաշարժի համար և որպես ապաստարան», – ասել է Կոնրիկուսը:
Կոնրիկուսն ասել է, որ իսրայելցի զինվորականների գնահատականներով՝ Գազայի հատվածից պաղեստինյան արմատականները մայիսի 10-ից Իսրայելի ուղղությամբ արձակել են ավելի քան 1800 հրթիռ, որից 430-ը, առանց հատելու սահմանը, ընկել է պաղեստինյան անկլավի տարածքում: Անցյալ գիշեր Գազայից հրթիռների երեք ալիք է արձակվել հրեական պետության տարածք, նշել է Կոնրիկուսը: