Նախօրեին հայտնի դարձավ, որ պորտուգալացի մասնագետ Ժոզե Մոուրինյոն ընթացիկ մրցաշրջանի ավարտից հետո կգլխավորի «Ռոման»։ Վերջինիս ներկայիս գլխավոր մարզիչ Պաուլո Ֆոնսեկան ամռանը կհեռանա։ Կարող ենք արձանագրել, որ Ֆոնսեկային չհաջողվեց նշանակալի արդյունք գրանցել, ինչը դարձավ աշխատանքի դադարեցման հիմնական պատճառ։ Մոուրինյոյի Հռոմի թիմի գլխավորելը բուռն արձագանք գտավ հատկապես հայ երկրպագուների շրջանում։ Կխաղա արդյո՞ք Հայաստանի ազգային հավաքականի ավագ Հենրիխ Մխիթարյանը Մոուրինյոյի թիմում։ 2016-2018 թվականներին Մխիթարյանը Մոուրինյոյի գլխավորությամբ ելույթ է ունեցել «Մանչեսթեր Յունայթեդի» կազմում։ Նշենք նաև, որ Մխիթարյանը հենց Մոուրինյոյի գլխավորությամբ է տիրացել իր կարիերայի ամենանշանակալի տիտղոսին։ 2017 թվականին «Մանչեսթեր Յունայթեդը» նվաճեց Եվրոպա լիգայի գավաթը, իսկ Մխիթարյանը դարձավ եզրափակիչ մրցավեճի հերոսը։ Չմոռանանք սակայն, որ հայ ֆուտբոլիստը ոչ այնքան լավ հարաբերությունների մեջ էր պորտուգալացի մասնագետի հետ։ Մասնավորապես, Մոուրինյոն այսպես ասած հակված չէր խաղադաշտում օգտագործելու Մխիթարյանի պոտենցիալը։
Պատճառներից մեկը, որ Մխիթարյանը «Յունայթեդից» տեղափոխվեց «Արսենալ»՝ հենց Մոուրինյոն էր։ Հայ ֆուտբոլիստը ցանկանում էր առաջ շարժվել՝ դավանելով հարձակվողական ֆուտբոլ։ Արսեն Վենգերի գլխավորությամբ մեր հավաքականի ավագը «Արսենալում» ստացավ այդ հնարավորությունը, բայց․․․։ Վենգերը հեռացավ, իսկ նրան փոխարինած Ունայ Էմերին խառնեց խաղաքարտերը։ «Ռոմայում» Մխիթարյանը ունեցավ դրսևորվելու հնարավորություն և բարձր արդյունքներ գրանցեց։ Դրան էապես նպաստեց նաև Ֆոնսեկան։ Մոուրինյոյի «Ռոմայում» հայտնվելը կարելի է համարել ճակատագրի հեգնանք Մխիթարյանի նկատմամբ։ Ուշագրավ վիճակագրական փաստարկներ․ Մխիթարյանի «Մանչեսթեր Յունայթեդից» հեռանալուց ամիսներ անց, նույն 2018 թվականին այս թիմից հեռացավ նաև Մոուրինյոն։ Վերջինս ինչպես Մխիթարյանը տեղափոխվեց Լոնդոն՝ գլխավորելով «Տոտենհեմը»։ Մոուրինյոն, ինչպես Մխիթարյանը Լոնդոնից տեղափոխվում է Իտալիայի մայրաքաղաք։ Ու հիմա հայ ֆուտբոլիստի ու հայտնի մարզչի ճանապարհները խաչվում են։ Վերջին զարգացումները ստիպում են պնդել, որ մրցաշրջանի ավարտին Մխիթարյանը կհեռանա «Ռոմայից»։ ««Յուվենտուսի» մարզչական կազմը վստահ է, որ Մխիթարյանը արդյունավետ կհամագործակցի թիմի առաջատար Կրիշտիանո Ռոնալդուի հետ։ Թուրինյան ակումբը պատրաստ է տարեկան 5 միլիոն եվրո վճարել Մխիթարյանին։ Տեղափոխության վերաբերյալ դեռևս պաշտոնական տեղեկություն չկա։ Քանի որ «Ռոման» չի երկարաձգել պայմանագիրը Մխիթարյանի հետ, հավանականությունը մեծ է «Յուվենտուսը» կհաղթի հայ ֆուտբոլիստի համար պայքարում»,- օրեր առաջ գրել էր «Torino Sport»-ը։
Վերջինս նշել էր նաև, որ «Յուվենտուսի» ղեկավարությունը բանակցություն է վարում հայ կիսապաշտպանի հետ։ Նշենք, որ եթե «Ռոման» մինչև մրցաշրջանի ավարտը չերկարաձգի պայմանագիրը Մխիթարյանի հետ, վերջինս ամռանը կստանա ազատ ֆուտբոլիստի կարգավիճակ և «Յուվենտուսն» առանց ֆինանսական փոխհատուցման կկարողանա պայմանագիր կնքել։ «Մխիթարյանը դեմ չէ «Ռոմայում» կարիերան շարունակելուն: Նա լավ է զգում Հռոմում, բնակվում է ընտանիքի հետ: Ամեն ինչ կախված է նրանից, թե ով կգլխավորի «Ռոման» և կհաջողվի արդյոք ձեռք բերել Չեմպիոնների լիգայի ուղեգիր» ,- գրել էր իտալական մամուլը։ Եվրոպա լիգայի խաղարկության կիսաեզրափակչի առաջին խաղում «Ռոման» մեկ շաբաթ առաջ հյուրընկալվելիս 6։2 հաշվով ջախջախիչ պարտություն էր կրել «Մանչեսթեր Յունայթեդից»։ Եզրափակիչ փուլ դուրս գալու համար իտալական թիմին անհրաժեշտ է հաղթել առնվազն 4։0 հաշվով, ինչը գործնականում հնարավոր չէ։ «Ռոման» հրաժեշտ կտա Եվրոպա լիգային և չի մասնակցի 2021/2022 թթ Չեմպիոնների լիգայի խաղարկությանը։ Ընթացիկ մրցաշրջանում «Ռոմայի» հանդիպումները մարզական առումով այնքան էլ կարևոր չեն։
Խոսվում է, որ Մխիթարյանի գործակալ Մինո Ռայոլան ակտիվ աշխատանքներ է տանում հայ ֆուտբոլիստի տեղափոխության ուղղությամբ։ Հավանականությունը մեծ է, որ գալիք մրցաշրջանում Հայաստանի հավաքականի ավագին կտեսնենք Թուրինի «Յուվենտուսում»։
