Ուկրաինայի նախագահ Վլադիմիր Զելենսկին մեկնաբանել է Մոսկվայի և Տամբովի մարզերում Wildberries-ի պահեստների վրա ուկրաինական անօդաչուների հարձակումը՝ դա անվանելով պատասխան Ուկրաինայի քաղաքացիական ենթակառուցվածքներին հասցված ռուսական հարվածներին։ Ըստ նրա՝ ընկերության լոգիստիկ կենտրոններում պահվում էին ԱԹՍ-ների պահեստամասեր։
«Այսօր մեր հեռահար պատժամիջոցներն աշխատել են երեք ուղղությամբ ռուսական տարածքում, ինչպես նաև ժամանակավորապես օկուպացված մեր հողում և ծովում։ Մասնավորապես, որպես պատասխան մեր քաղաքացիական ենթակառուցվածքներին, մեր քաղաքներին ու մարզերին հասցված ռուսական հարվածներին, խոցվել են երկու խոշոր լոգիստիկ օբյեկտներ Մոսկվայի և Տամբովի շրջաններում՝ ռազմաճակատի գծից ավելի քան 500 և մոտ 700 կմ հեռավորության վրա։ Ագրեսորը դրանք օգտագործել է անօդաչուների և նավիգացիոն սարքավորումների արտադրության համար պատժամիջոցների տակ գտնվող պահեստամասերի մատակարարումն ապահովելու նպատակով։ Խոցվել է նաև նավթային օբյեկտ»,- հայտարարել է Ուկրաինայի նախագահը։
Տամբովի մարզում Wildberries-ի պահեստի վրա հարձակման հետևանքով զոհվել է ընկերության 7 աշխատակից, ևս 25-ը վիրավորվել են։ Բացի այդ, 24 մարդ է տուժել մերձմոսկովյան Էլեկտրոստալում գտնվող ընկերության լոգիստիկ կենտրոնին ուկրաինական անօդաչուների հասցրած հարվածի հետևանքով։
