Արարատի մարզի Վեդի համայնքի կենտրոնում ցուցապաստառի վրա Արցախի հերոս, փոխգնդապետ Դավիթ Ղազարյանի նկարն է, որտեղ գրված է «Մարտը վարել է՝«Ոչ մի քայլ հետ» սկզբունքով»։ Այսօր նրա ծննդյան օրն է, հենց նրա ծնդյան օրը փորձել են ցուցապաստառը հանել՝ տեղը Ռոբերտ Քոչարյանի ցուցապաստառը փակցնելու նպատակով, սակայն, համայնքի բնակիչները նկատել են եւ թույլ չեն տվել:
«Վեդի համայնքի բնակիչները միահամուռ կերպով եկել են և տեր կանգնել հերոսի նկարին, ասել, որ մեր հերոսի նկարը պետք է մնա տեղում։ Ինձ զանգեցին, արագ եկա, փորձեցի համայնքապետարանից ճշտել, աշխատակիցներից մեկն էլ ասաց, որ հարցը լուծվել է, հերոսի նկարը նորից հետ են փակցրել»,-«Առաջին լրատվական»-ի հետ զրույցում պատմեց Դավիթ Ղազարյանի փեսան՝ Արթուրը։ Նրա խոսքով՝ պետք չէ այս ամենին քաղաքականություն խառնել. «Ամեն դեպքում Արցախի հերոս էր վրան գրված: Միթե իրենց հերոսը չէր, միթե իրենց համար արյուն չէր թափել, և եթե մենք այսօր ապրում ենք շնչում, այս տղաների շնորհիվ է։ Դավիթ Ղազարյանը բոլորի հերոսն է»,-հավելեց Արթուրը:
