«Առաջին լրատվական»-ի հարցերին պատասխանել է ՄԱՀՀԻ ասոցացված փորձագետ, իրանագետ Էմմա Բեգիջանյանը:
-Իրանում ներքաղաքական բավական լարվածություն է առաջացել հունիսին կայանալիք ընտրություններից առաջ: Իրանական լրատվամիջոցները հրապարակել են ԱԳ նախարար Զարիֆի 7 ժամանոց հարցազրույցը, որտեղ որոշակի աղմկահարույց հայտարարություններ է արել, քննադատել է Ռուսաստանին, պնդել է, որ Պուտինի պնդմամբ է զորք ուղարկել Սիրիա, ասել է, որ Մոսկվան մի քանի անգամ փորձել է խանգարել Իրանի միջուկային ծրագրերի կարգավորման ճանապարհային քարտեզը և բազմակողմանի բանակցությունները: Դուք ինչպե՞ս եք գնահատում ստեղծված իրավիճակը և ինչի՞ կարող են հանգեցնել ընտրություններն Իրանում:
Իրանում փաստորեն ընտրարշավ է, և հիմնական պայքարը գնում է երկու թևերի միջև: Այդ հարցազրույցը պետք է փաստորեն հրապարակվեր, երբ արդեն կձևավորվեր նոր իշխանություն: Ընդհանուր առմամբ Զարիֆի հայտարարություններում ճշմարտություններ են, որոնք նա խոստովանել է: Պարզապես խոսել է դրանց մասին որպես խնդիրներ: Իհարկե, չմոռանանք, որ եղել են դեպքեր, երբ Ռուսաստանը ՄԱԿ-ում դեմ է քվեարկել հենց Իրանի միջուկային հարցի առնչությամբ: մինչև բանակցությունները: Իրանական փորձագետները միշտ վկայակոչում են այն, որ Ռուսաստանը դեմ է քվեարկել: Եթե դուք հիշում եք, ես միշտ էլ ասել եմ, որ պատմականորեն 2 երկրների միջև կա փոխադարձ անվստահություն, բայց կան մարտավարական շահեր: Այսինքն հիմա իրավիճակն այնպիսին է, որ երկուսն էլ Արևմուտքի կողմից պատժամիջոցների են ենթարկվում, Արևմուտքի հետ երկուսի հարաբերություններն էլ լարված են, հետևաբար, կարող են իրենք համագործակցել, քանի որ ինչպես ասում են՝ թշնամուս թշնամին իմ բարեկամն է: Իրանը պետք է Արևմուտքի հետ հարցերը լուծի և այս բանակցություններն արդյունք ունենան, իսկ Իրանի գործարարները հակված են դեպի արևմտյան տեխնոլոգիաներ: Անգամ Չինաստանի հետ 25-ամյա համաձայնությունը ինչ-որ տեղ ճնշման լծակ էր, որպեսզի Արևմուտքը, ԱՄՆ-ն վերադառնան առանց Իրանին նոր պարտավորություններ պարտադրելու: Այսպիսի մի տարբերակ կա, որ գուցե Զարիֆը բարենորոգիչների թեկնածուներից լինի: Ամեն դեպքում այնպես չի, որ Իրանում մեծ լարվածություն կա: Ուղղակի ինչպես բոլոր դեպքերում, նախընտրական մթնոլորտում յուրաքանչյուրն էլ իր ձեռքի տակ եղած գործիքներն օգտագործում է:
-Հաշվի առնելով, որ Իրանում ներքաղաքական իրավիճակը, տնտեսական վիճակը բավականին սրված է, շանսերն ինչպիսի՞ն են Զարիֆի:
Բարենորոգիչներն ընդհանրապես մրցակցելու շանսեր կունենան այն դեպքում, եթե մինչև ընտրությունները վերականգնվի Իրան+1-ի համաձայնությունը, այլապես 100 տոկոսով ընտրվելու են պահպանողականները, որոնք կարծում եմ՝ ևս կարող են բանակցել: