«Առաջին լրատվական»-ի հետ զրույցում անդրադառնալով Հայաստանից սկսված արտագաղթի այս նոր ծավալներին, Շվեյցարիա-Հայաստան ընկերակցության պատվո նախագահ Սարգիս Շահինյանը նշեց.
«Ինձ համար ամենակարևորն այն է, թե ընտանիքով ինչպես պիտի կարողանամ ապրել, աճել տվյալ երկրում, և արդյոք լա՞վ կարող եմ ապրել, թե դժվարություններով։ Կարո՞ղ եմ իմ ունեցած տնտեսական կարողություններով ապահովել ընտանիքիս առաջիկան։ Եթե երեխաներ ունենամ, պետք է ինձ հետաքրքրի ուսման հետ կապված երկրի կացությունը, թե ինչ տեսակ մակարդակի ուսում կարող են ապահովել երեխայի համար»։
Ս. Շահինյանը կարևորեց նաև բանակի հետ կապված պայմաններին տեղյակ լինելը, ու առողջապահական խնդիրը, թե ինչ հնարավորություն ունի մարդը տվյալ երկրում ապահով բուժվելու։
«Եթե այս հարցերի բացարձակ մեծամասնության պատասխանը կլինի այո, ապա ամեն ինչ կանեմ՝ Հայաստան վերադառնալու համար»,- ապա հավելեց.
«Խնդիրն այն է, որ մենք մնացել ենք 2 միլիոն՝ որրքան էլ Հայաստանի կառավարությունը հերքի։
Իսկ ով որ Հայաստանը թողնում է, թողնում է չվերադառնալու համար։ Սա խնդիր է ազգային, սոցիալական և տնտեսական անվտանգության համար։ Ի վերջո, Երևանի կենտրոնում ռեստորանների ավելացմամբ չեն չափում մեր աճը»։
