Իրանի ԱԳՆ ղեկավար Մոհամադ Ջավադ Զարիֆը հայտարարել է Նաթանզի միջուկային օբյեկտում տեղի ունեցած վթարին Իսրայելի մասնակցության մասին: Ըստ Իրանի արտգործնախարարի, Իսրայելի գործողություններն ուղղված են միջուկային գործարքի շուրջ բանակցությունները խափանելուն, հաղորդում է ՏԱՍՍ-ը:
«Իսրայելցի քաղաքական գործիչները և զինվորականները բացահայտ ասում են, որ թույլ չեն տա առաջընթաց գրանցել և վերացնել անարդար պատժամիջոցները, և այսօր նրանք կարծում են, որ հասել են իրենց նպատակին: Իսրայելին պատասխանը էլ ավելի մեծ առաջընթաց կլինի միջուկային ոլորտում»,- ասել է Զարիֆը:
Նա զգուշացնում է ծուղակի մասին, որն Իսրայելը ստեղծել է Իրանի էլիտայի և ժողովրդի համար:
«Իրանի պատասխանը կլինի վրեժը իսրայելական ռեժիմին՝ համապատասխան ժամանակ: Նաթանզի միջուկային օբյեկտում ոչ մի վնաս չի հասցվել ոչ մարդկանց, ոչ շրջակա միջավայրին, բայց դա կարող էր հանգեցնել աղետի, որը հանցագործություն է մարդկության դեմ»,- զգուշացնում է Իրանի ԱԳՆ պաշտոնական ներկայացուցիչ Սաիդ Խաթիբզադեն:
