Համավարակի մոլեգնող նոր ալիքի պայմաններում տեղին կլինե՞ն արդյոք սահմանափակումները: «Առաջին լրատվական»-ի հետ զրույցում անդրադառնալով այս հարցին՝ Առողջապահության ազգային ինստիտուտի տնօրենի գլխավոր խորհրդական Դավիթ Պետրոսյանը նշեց, որ սահմանափակումները տարբեր կարող են լինել. «Միմյանցից հեռավորություն պահելն էլ է սահմանափակում, մարդկանց ասել՝ տանը նստեք, աշխատանքի մի՛ գնացեք, դա էլ է սահմանափակում:
Մեկ տարի առաջ հենց այս օրերին շատ խիստ սահմանափակումների նպատակը մեկն էր՝ պետք էր վարակելիության կորագիծը հարթեցնել, մեր առողջապահական հզորությունները հարմարեցնել հիվանդների թվին, և դա ստացվեց: Անհրաժեշտ է պահպանել կանխարգելման միջոցները՝ դիմակ կրել, հեռավորություն պահպանել, շատ մարդկանցով չհավաքվել. մենք տեսանք, որ դրանք արդյունավետ միջոցներ են և պետք է շարունակել պահպանել: Մենք կարգապահ ազգերի մեջ չենք մտնում, բայց պետք է աշխատել այդ ուղղությամբ:
«Պետք է միմյանց ռիսկերի չենթարկենք: Հնարավոր է վիրուսը դեռ ահագին ժամանակ, միգուցե հավերժ լինելու է, և դրանից ամբողջությամբ ազատվելու համար ստեղծվեց պատվաստանյութը»,- նշեց Դավիթ Պետրոսյանը՝ տեղեկացնելով, որ ինքն արդեն պատվաստվել է, և առողջական ոչ մի բարդություն չի առաջացել:
Նա նաև կարծիք հայտնեց, որ հոկտեմբեր-նոյեմբերին կորոնավիրուսն արդեն չի լինի. «Կպատվաստվենք-կպրծնենք»:
Մանրամասն՝ տեսանյութում: