Տեր-Պետրոսյանի առաջարկած ելքը մտահոգիչ է: Այս մասին «Առաջին լրատվական»-ի հետ զրույցում նշեց «Քաղաքացու որոշում» կուսակցության գործադիր մարմնի անդամ Հայկ Սահակյանը՝ անդրադառնալով առաջին նախագահի օրերս արված հայտարարությանը:
Հիշեցնենք, առաջին նախագահ, ՀԱԿ ղեկավար Լևոն Տեր-Պետրոսյանը հայտարարության մեջ նշել է. «Թե՛ պետության, թե՛ ժողովրդի, թե՛ նաև անձամբ վարչապետի շահերից բխող միակ ելքը, վերջինիս անհապաղ և ինքնակամ հրաժարականն է և Ազգային ժողովի կողմից անձեռնմխելիության իրավական երաշխիքների ապահովմամբ, նրա, թեկուզ ժամանակավոր, ապաստանումն արտերկրում»: Տեր-Պետրոսյանի կարծիքով՝ վարչապետի պարտականությունները պետք է դրվեն անկուսակցական փոխվարչապետի վրա, որն իր չեզոքության հանգամանքով ունակ է ապահովելու արդար ընտրությունների անցկացումը:
«Այն, որ Տեր-Պետրոսյանն ասում է, թե վարչապետը պետք է երկրից գնա, սա նորություն է և անհանգստացնող է: Նախկին նախագահները Հայաստանում են, նրանց դեմ անգամ քրեական գործեր կան հարուցված, բայց նրանք չեն լքում երկիրը: Եթե Փաշինյանին վտանգ է սպառնում, պետք է Տեր-Պետրոսյանը բարձրաձայնի:
Փաստորեն երկրի առաջին դեմքը չի կարողանում ապահովել իր անվտանգությունը, այդ դեպքում մյուս քաղաքացիների անվտանգությունն ինչպե՞ս պետք է ապահովվի, այսինքն՝ պետական ապարատն ամբողջությամբ չի գործում, սա շատ մտահոգիչ չէ»,- նշեց Սահակյանը:
«Ժամ առաջ պետք է սկել երկրի զարգացումը, որովհետև բազմաթիվ խնդիրներ ունենք տարբեր ոլորտներում: Փոխադարձ մեղադրանքները, նման հայտարարությունները և այն, ինչ տեղի է ունենում Բաղրամյան պողոտայում, անբովանադակ օրակարգ են և շեղում են հիմնական օրակարգերից»,- նշեց «Արդար Հայաստան» կուսակցության անդամ Ռաֆայել Հովհաննիսյան:
«Տեր-Պետրոսյանի հայտարարությունն ինձ համար անհասկանալի է այն առումով, որ եթե ՀՀ վարչապետը սխալներ է թույլ տվել, մեղավորություն ունի, ապա պետք է պատասխան տա ժողովրդի առաջ: Բոլոր նախագահները Հայաստանում են, ինչո՞ւ Փաշինյանը պետք է ապաստան խնդրի որևէ երկրից»,- նշեց Հովհաննիսյանը:
Հայկ Սահակյանի դիտարկմամբ՝ 91թ. սկսած՝ սխալ քաղաքականություն է վարվում, ինչն էլ հանգեցրեց ծանր պարտության: Նրա խոսքով՝ այս պարտության մեջ մեղավոր են ոչ միայն Փաշինյանը և ներկա իշխանությունը, այլ նաև նախկին իշխանությունները:
«Քաղաքական համակարգը փտած է, խորքային փոփոխություններ, բարեփոխումներ տեղի չունեցան, ինչն անհրաժեշտություն է»,- նշեց Հովհաննիսյանը՝ հավելելով, որ քաղաքական միտքը պարտվեց պատերազմում: Նրա խոսքով՝ Պետք է փոփոխություններ լինեն. յուրաքանչյուր իշխանություն պետք է կարողանա արժանապատվորեն կազմակերպել ընտրություններ և պարտության դեպքում հեռանալ:
Հայկ Սահակյանը նկատեց, որ «չեմուչումով», բայց բոլորն էլ հանգում են ընտրությունների գաղափարին:
Մանրամասները՝ տեսանյութում:
