ՌԴ-ում ադրբեջանցու սպանելու համար 18 տարի ազատազրկման դատապարտված Արման Առաքելյանը մարտի 13-ին Հայաստան է տեղափոխվել։ Նա հետագա պատիժը կկրի հայրենիքում։ Այս մասին «Առաջին լրատվական»-ի հետ զրույցում ասաց Առաքելյանի պաշտպան Արթուր Դաշյանը։
Հիշեցնենք. տարիներ առաջ՝ 2015-ի սեպտեմբերին, ՌԴ հայկական ռեստորաններից մեկում վիճաբանության ժամանակ Առաքելյանը սպանել էր ադրբեջանցի տղամարդու։ Ռուսաստանաբնակ փաստաբան Արթուր Դաշյանը 2017-2018 թվականներից զբաղվում էր Առաքելյանի՝ Հայաստան արտահանձնման հարցերով։ Տարիներ տևած պայքարից հետո վերջապես փաստաբանին հաջողվել է իր պաշտպանյալին տեղափոխել Հայաստան։
Ռուսաստանաբնակ փաստաբան Արթուր Դաշյանը «Առաջին լրատվական»-ի հետ զրույցում ասաց, որ Արման Առաքելյանի՝ Հայաստան տեղափոխվելու հիմնական խոչընդոտը եղել է հայկական կողմից, այլ ոչ թե Ռուսաստանից: «Ժամանակի ընթացքւոմ բավական մեծ բանակցային աշխատանք է տարվել հայկական կողմի հետ, տարբեր ատյանների հետ, ու եկանք կոնսենսուսի, ու հայկական կողմը որոշեց իրեն վերցնել։
Ռուսական կողմը դեռևս 2017 թվականին՝ իմ դիմելուց 5 ամիս անց, արդեն որոշում էր կայացրել հանձնել Առաքելյանին, բայց հայկական կողմը տևական ժամանակ չէր ընդունում իրեն։ Մինչև 2020 թվականի սկիզբը իրեն չէին ցանկանում ընդունել»,- ասաց Դաշյանը՝ հավելելով, որ կոնվենցիայի համաձայն՝ ընդունելու որոշումը արդարադատության նախարարի միանձնյա որոշման հիման վրա է տեղի ունենում, իսկ արդարադատության նախկին նախարար Արտակ Զեյնալյանը չէր համաձայնում Արման Առաքելյանին Հայաստան տեղափոխելուն:
«Զեյնալյանն իր անձնական ամբիցիաներից ելնելով կամ այլ պատճառներով, որոնք ինքը չի բարձրաձայնել, չէր ստորագրում Արմանին Հայաստան տեղափոխելու փաստաթուղթը, բայց երբ Ռուստամ Բադասյանը եկավ, նա այդ քայլը դրական համարեց, ստորագրեց փաստաթուղթը և տեղափոխման ակտը հաստատեց։ Դրանից հետո պարզապես պանդեմիայի ու պատերազմի պատճառով ձգձգվեց տեղափոխման հարցը, բայց ի վերջո մարտի 13-ին նրան տեղափոխեցին»,- ասաց փաստաբանը։
Արթուր Դաշյանը նշեց, որ շատ դրական է գնահատում փաստը, որ վերջապես Արմանը տեղափոխվեց Հայաստան, քանի որ նրա կյանքին կարող էր վտանգ սպառնալ։ Շրջանառվող տեղեկությունների համաձայն՝ ադրբեջանցիները ցանկանում էին վրեժխնդիր լինել, և ամեն պահի հնարավոր է դա տեղի ունենար: «Նման չհաստատված տեղեկություններ կային, որոնք նաև ինձ էին հասել»,- ասաց Դաշյանը։
Նշենք, որ Արման Առաքելյանը Հայաստանում կկրի պատժի մնացած 12 տարին։ «Նորմատիվներով նա իր պատժաչափը մինչև վերջ պետք է կրի արդեն Հայաստանում։ Պետք է կրի մինչև վերջ, թե ոչ՝ դա արդեն Հայաստանի վերին ատյանների որոշելիքն է»,- ասաց փաստաբանը։
Արման Առաքելյանը հիմա լավ է, թեև որոշակի առողջական խնդիրներ ունի։ Նա կարճատև տեսակցել է հարազատներին, առաջիկա օրերին կտեղափոխեն քրեակատարողական հիմնարկ, մինչ այդ դեռ ընթացակարգային հարցեր կան լուծելու։
Լուսանկարը՝ Photolure-ի
