«Միայն Բայաթյանը չէ, որ դիմել է Մարդու իրավունքների եվրոպական դատարան. կարծում եմ՝ շատերը դիմած կլինեն, քանի որ այսօր Հայաստանում կազմակերպությունից շուրջ 70 մարդ բանտերում է նստած, ինչը նշանակում է, որ Հայաստանին սպասում է «Եհովայի վկաներ»-ին փող տալու, բաժանելու մեծ հնարավորություն». այդ մասին ասաց «Հելսինկյան ասոցիացիա» ՀԿ նախագահ Միքայել Դանիելյանը՝ «Առաջին լրատվականի» հետ զրույցում մեկնաբանելով ՙԲայաթյանն ընդդեմ Հայաստանի՚ գործով Մարդու իրավունքների եվրոպական դատարանի Մեծ պալատի կայացրած վճիռը, համաձայն որի՝ Հայաստանի Հանրապետությունը դիմումատուին պետք է վճարի 20 հազար եվրոյին համարժեք դրամ:
Նրա խոսքով՝ վճիռը սպասելի էր, քանի որ երկար ժամանակ Հայաստանի Հանրապետության իշխանությունները խոսում են դեմոկրատիայի ու լիբերալիզմի մասին, իսկ իրականում կրոնական ազատությունները Հայաստանում վտանգված էին ու վտանգված են:
««Եհովայի վկաները» նստած են բանտերում, իսկ խղճի ու ազատության օրենքը չի համապատասխանում միջազգային չափանիշներին, և այդ պատճառով կրոնական կազմակերպություններին հարող անձինք հրաժարվում են անցել ծառայություն»,- ասաց նա՝ ավելացնելով, որ «Հելսինկյան ասոցիացիան» դեռ 1998 թ. ներկայացրել է միջազգային չափանիշներին համապատասխանող օրենք այլընտրանքային ծառայության մասին, սակայն Հայաստանի իշխանությունները լուրջ չեն վերաբերվել դրան:
«Իշխանությունները մարդու իրավունքները դասեցին ավելի ցածր, քան ազգային-պետական շահերը, ինչի վառ վկայությունն է Եվրադատարանի կայացրած վճիռը»,- նշեց նա:
Նա չբացառեց, որ լինեն նաև Եվրադատարան դիմած այլ «Եհովայի վկաներ», քանի որ նախադեպային իրավունքով կայացվող Եվրոպական դատարանի որոշումները կարող են կրել շարունակական բնույթ:
Նրա խոսքով՝ սա «Եհովայի վկաներ» կրոնական կազմակերպության առաջին լուրջ հաջողությունն էր Հայաստանում:
«Եթե իշխանությունները որոշել են փող ծախսել՝ թող ծախսեն: Ամեն տարի մինչև 70 հոգի է նստում»,- ասաց Մ.Դանիելյանը:
