2008 թ. օգոստոսին տեղի ունեցած ռուս-վրացական պատերազմից հետո արդեն երեք տարի է անցել, և այս տարիների ընթացքում ռուս-վրացական հարաբերությունները շարունակել են լարված մնալ, և որևէ տեղաշարժ չի արձանագրվել:
Ռուսաստանի քաղաքական և ռազմական վերլուծությունների ինստիտուտի ղեկավար, պահեստազորի գնդապետ Անատոլի Ցիգանոկը «Առաջին լրատվականի» հետ զրույցում նշեց, որ այդ հարաբերությունները դրական տեղաշարժ կարձանագրեն միայն այն ժամանակ, երբ Վրաստանի ներկայիս նախագահ Միխեիլ Սաակաշվիլին կհեռանա իշխանությունից. «Հնարավոր է նոր նախագահն ավելի լավ կզարգացնի հարաբերությունները Ռուսաստանի հետ»:
Ինչ վերաբերում է պատերազմին հաջորդած երեք տարիների ընթացքում արձանագրված փոփոխություններին թե՛ տարածաշրջանում և թե՛ Վրաստանում, Ցիգանոկը նշեց, որ այն հանգամանքը, որ Ռուսաստանը և մի շարք երկրներ ճանաչել են Աբխազիան և Հարավային Օսիան, արդեն իսկ դրական քայլ է, և դրա արդյունքում այդ երկրներն ունեն իրենց բանակը, ինչպես նաև Աբխազիայում ռուսական ավիացիան հնարավորություն է ձեռք բերել ունենալ ներկայություն: Նա նաև որպես փոփոխություն համարեց այն հանգամանքը, որ այժմ տարածաշրջանային երկրները ուղղվածություն ունեն ոչ միայն դեպի Ռուսաստան և Արևմուտք, այլ նաև դեպի Թուրքիա և Իրան:
Ռուս փորձագետի գնահատմամբ՝ Աբխազիայի և Հարավային Օսիայի միջազգային ճանաչումը դրական ազդեցություն կարող է ունենալ Լեռնային Ղարաբաղի հարցի վրա. «Սա շատ լավ նախադրյալ կարող է լինել Լեռնային Ղարաբաղի ճանաչման համար: Շատ նորմալ է, որ մեկ ազգն ունենա երկու պետություն, քանզի նման նախադրյալներ եղել են ու կան՝ Գերմանիան, Կորեան»:
Ցիգանոկը Աբխազիայի ճանաչման համար շատ կարևոր համարեց նաև առաջիկայում այդ երկրում սպասվելիք ընտրությունները: Ըստ նրա՝ Աբխազիայի ընտրությունների ճանաչումը միջազգային հանրության կողմից արդեն իսկ դրական քայլ կլինի:
Անատոլի Ցիգանոկն առանձին ընդգծեց վերջերս շրջանառվող այն տեղեկությունը, թե Հարավային Օսիան ցանկանում է միանալ Ռուսաստանին: Նրա գնահատմամբ՝ դա լուրջ խնդիր է և, իհարկե, Հարավային Օսիայի ղեկավարության որոշումը ընդունելի է, սակայն առաջիկայում դժվար թե նման զարգացումներ լինեն: