Այսօրվանից գործարկվել է «Ճամփորդիր առանց COVID-19-ի» ծրագիրը. Հայաստանի Հանրապետության քաղաքացիների համար Ռուսաստանի Դաշնությունը բացել է օդային սահմանը: Մի քանի ամսվա դադարից հետո Հայաստանի քաղաքացիները կրկին Ռուսաստան մեկնելու հնարավորություն ունեն։ Այս առումով կան հակասական գնահատականներ:
Թեմայի շուրջ «Առաջին լրատվական»-ի հետ զրույցում իրենց դիտարկումները ներկայացրին ժողովրդագիր Արտակ Մարկոսյանը և սոցիոլոգ Արտակ Սաղաթելյանը:
Արտակ Մարկոսյանի դիտարկմամբ՝ կորոնավիրուսի համավարակով պայմանավորված լոքդաունի պատճառով մեր շատ հայրենակիցներ իրենց աշխատանքը ՌԴ-ում կորցրել էին և վերադարձել հայրենիք, հիմա, երբ հնարավորություն է ստեղծվել, աշխատանքային միգրանտները նորից մեկնում են. «Այստեղ արտառոց բան պետք չէ փնտրել, աշխատանքային ժամանակավոր միգրացիա է տեղի ունենում: Արտագնա աշխատանքի են մեկնում հիմնականում մարզերից, նրանք, ովքեր գրեթե ամեն տարի մեկնել են»:
Արտակ Սաղաթելյանը, անդրադառնալով դիտարկմանը, որ այս օրերին արտագաղթի մասին գույժ է տարածվել, նշեց. «Կարծում եմ՝ դա գլխավորապես պայմանավորված է սպասումներով: «Թեև առաջին օրերին մեկնողների մեծ մասը աշխատանքային միգրանտներ են, բայց չենք կարող անտեսել, որ կան բացասական սպասումներ՝ պայմանավորված սոցիալ-տնտեսական վատթարացող իրավիճակի և մեր երկրի անվտանգության թուլացման հետ: Մտավախություններ կան, և դրանք շատ են»:
Արտակ Մարկոսյանի խոսքով՝ 2019թ. Հայաստանի մեկնողների թիվը նվազել էր, երբ դեռ ո՛չ կորոնավիրուսի համավարակը կար, ո՛չ պատերազմը: «Այժմ միջավայրը փոխվել է: Մեր սահմանամերձ գյուղերն ունեին, այսպես ասած, պաշտպանիչ գոտի, որն այլևս չկա, խոսքս Մեղրիից մինչև Վարդենիս գյուղերի մասին է, ի տարբերություն Տավուշի մարզի գյուղերի, որտեղ տարիներով մարդիկ սովորել են արդեն ապրելուն: Իսկ Սյունիքը շատ վտանգավոր է: Այն ՀՀ ամենամեծ տարածքով մարզն է, մշտական բնակչությունը 137 հազար է… Այս պարագայում և՛ անվտանգային, և՛ տնտեսական խնդիրներ են առաջացել Սյունիքում: Պետք է հասկանալ, թե ինչ պետք է առաջարկել Մեղրիից մինչև Վարդենիս գյուղերի բնակիչներին, որպեսզի մարդիկ մնան այնտեղ: Եթե այս տեմպերով այդ գյուղերը շարունակվեն դատարկվել, կապ չունի, թե Երևանի բնակչությունը որքան է, մենք կարող ենք կորցնել Հայաստանը: Նվաճումը կարող է նաև ժողովրդագրական միջոցներով տեղի ունենալ»,- նշեց ժողովրդագիրը:
Մանրամասն՝ տեսանյութում:
