Եթե կան ներդրումներ, ապա կան նաև երկրներ, որոնք ներդրումներ շատ ունեն, և ոչ միայն ներդրումներ են ներգրավում, այլ նաև ներդրումների դոնորներ են: Ներդրումներ ներգրավելու համար պետք է ենթակառուցվածքները ճիշտ աշխատեն և համապատասխան գործիքակազմեր են անհրաժեշտ: Այս մասին «Առաջին լրատվական»-ի հետ զրույցում ասաց Ֆինանսական շուկաների ասցիացիայի գործադիր տնօրեն Կարեն Զաքարյանը:
Նրա դիտարկմամբ՝ Հայաստանում որոշ ենթակառուցվածքներ դեռևս զարգացման բավարար մակարդակի չեն. «Խոսքը վերաբերում է բաց բաժնետիրական ընկերությունների, ներդրումային ֆոնդերի քանակի ավելացման մասին և մեծ ենթակառուցվածքային ծրագրերի մասին, որոնք բաժնետիրական սկզբունքով կֆինանսավորվեն: Ներդրումներ հավանաբար կատարվում են, որոնք փոքր մասնավոր բիզնեսներում են տեղի ունենում, բայց եթե խոսքը վերաբերում է խոշոր ենթակառուցվածքային ծրագրերին, անհրաժեշտ է, որ դրան սպասարկող այլ ենթակառուցվածքներ էլ գործարկվեն, խոսքը նաև կապիտալի շուկայի գործիքակազմի մասին է, ցավոք, դեռևս բավարար մասշտաբով և ինտենսիվությամբ չի օգտագործվում սա, բայց մենք աշխատում ենք մեր գործընկերների հետ, այդ թվում նաև կառավարության, որպեսզի այս մեխանիզմները սկսեն ավելի ակտիվ լինել: Էկոնոմիկայի նախարար Վահան Քերոբյանը առավել ուշադրություն է դարձնում այդ խնդրին: Ամենամեծ խնդիրը ֆինանսական միջոցների մատչելիության խնդիրն է, որը պետք է Հայաստանում առաջնայիններից մեկը լուծվի»:
«Ներդրումային պրոցեսները Հայաստանում դանդաղել են և՛ օբյեկտիվ, և՛ սուբյեկտիվ պատճառներով: Եթե համավարակը և պատերազմը չլինեին, 2020թ. ավելի ակտիվորեն ներդրումներ կներգրավվեին: 2021թ. ճիշտ աշխատելու դեպքում հնարավոր կլինի վերականգնել ակտիվությունը: Կառավարությունն իր ջանքերը պետք է միավորի Կենտրոնական բանկի հետ: Այստեղ, կարծում եմ, չօգտագործված պոտենցիալ ունենք»,- նշեց Զաքարյանը:
Նրա կարծիքով՝ կարևոր է ներդրողների պաշտպանության ինստիտուտի ամրապնդումը:
«Այս կառավարության ամենամեծ խնդիրը հետևողականության պակասն է,- ընդգծեց Զաքարյանը: Նրա խոսքով՝ արդյունքի համար պետք է գնալ մինչև վերջ:
Մանրամասն՝ տեսանյութում:
