Իտալիայի ֆուտբոլի առաջնության 16-րդ տուրում «Ռոման» հյուրընկալվեց «Կրոտոնեին»: Հանդիպման մեկնարկից 8 րոպե անց ստանալով Մխիթարյանի փոխանցումը՝ «Ռոմային» առաջ մղեց Մայորալը: Հաջորդիվ հավասար պայքար էր ծավալվել դաշտում՝ թիմերը փոխանակվում էին գրոհներով: Բայց «Ռոմայի» թիմի ֆուտբոլիստները կարողացան օգտագործել հակագրոհը, և 28-րդ րոպեին նույն Մայորալը դարձավ դուբլի հեղինակ՝ գնդակն ուղարկելով դարպասի վերին անկյունը: Հանդիպման 34-րդ րոպեին «Կրոտոնեի» ֆուտբոլիստները խախտեցին խաղի կանոնները սեփական տուգանային հրապարակում, և նշանակված 11 մետրանոց հարվածն անվրեպ իրացրեց Մխիթարյանը: Երկրորդ կեսում «Կրոտոնեին» հաջողվեց միայն հեղինակության գնդակ խփել 71-րդ րոպեին:
Ֆուտբոլի ազգային թիմից Հենրիխ Մխիթարյանը «Ռոմայի» մեկնարկային կազմում էր, սակայն փոխարինվեց 63-րդ րոպեին: Այս հաղթանակից հետո «Ռոման» մրցաշարային աղյուսակում 3-րդն է: Հաջորդ հանդիպումը «Ռոման» կանցկացնի հունվարի 10-ին` մրցելով «Ինտերի» հետ:
Ինչևէ, երեկվա հանդիպումից հետո «Ռոմայի» գլխավոր մարզիչ Պաուլու Ֆոնսեկան կրկին բարձր է գնահատել Մխիթարյանի դերը իր թիմում՝ հնչեցնելով նաև գովեստի խոսքեր։ «Մխիթարյանն ամենախելացի ֆուտբոլիստներից է, որոնց հետ ես աշխատել եմ։ Քչերն են նրա նման գտնում ազատ գոտիներ։ Լուրջ հանդիպում էր, մենք հարգում էինք մրցակցի ուժը։ Մեր թիմը գերազանց գործեց առաջին խաղակեսում և վերահսկեց խաղը երկրորդում։ Մենք կարող էինք ավելի լավ պաշտպանությունից անցնել հարձակման, բայց ընդհանուր առմամբ լավ խաղացինք։ Ամենակարևորն այն է, որ վաստակեցինք 3 միավոր։ Հաջորդ խաղում մեզ սպասվում է բարդ պայքար «Ինտերի» դեմ, որը հրաշալի թիմ է։ Բայց մենք խաղադաշտ դուրս կգանք հաղթանակի նպատակով»,- նշել է Ֆոնսեկան։
Մխիթարյանը Իտալիայի ընթացիկ առաջնությունում կատարել է 7 գոլային փոխանցում և այդ ցուցանիշով Ա Սերիայի այս մրցաշրջանի առաջատարն է։ Նա մասնակցել է 16 հանդիպման, խփել է 8 գոլ և թիմի լավագույն ռմբարկուն է ընթացիկ առաջնությունում։ Ա սերիայի ռմբարկուների հաշվարկում էլ Մխիթարյանը ընդամենը 2 գոլով է զիջում երրորդ հորիզոնականը կիսող Զլատան Իբրահիմովիչին և Չիրո Իմոբիլեին։ Հայ ֆուտբոլիստի գրանցած արդյունքներն իսկապես տպավորիչ են։
Ավելի վաղ հայտնի էր դարձել, որ Հենրիխ Մխիթարյանը «Ռոմայի» 2020 թվականի երկրորդ լավագույն ռմբարկուն է: Մասնավորապես, «Ռոման» ներկայացրել էր անցնող տարվա ռմբարկուների ցուցակը, որը գլխավորում է Էդին Ջեկոն: Նա 36 խաղում խփել էր 16 գնդակ: Ընդհանուր մրցաշարերում Մխիթարյանը 36 խաղում խփել էր 14 գնդակ: Եռյակը եզրափակում է Ժորդան Վերետուն, ով 38 խաղում դարձել է 13 գոլի հեղինակ:
Այս տարվա սկզբին Հենրիխ Մխիթարյանը ճանաչվել էր նաև «Ռոմայի» դեկտեմբեր ամսվա լավագույն ֆուտբոլիստ: Մասնավորապես, «Ռոմայի» պաշտոնական կայքում անցկացված քվեարկության արդյունքում հենց Մխիթարյանն էր ամենաշատ ձայները ստացել: 2020 թվականի դեկտեմբերի 25-ին Հայաստանի ֆուտբոլի ֆեդերացիան ամփոփել էր «Տարվա լավագույն ֆուտբոլիստ» անվանակարգում 2020 թվականի քվեարկության արդյունքները: Հավաքելով 133 միավոր՝ Հայաստանի 2020թ. լավագույն ֆուտբոլիստ է ճանաչվել Մխիթարյանը, ով արժանացավ այս կոչմանը 10-րդ անգամ: