2020 թվականը ծանր տարի էր ամբողջ աշխարհի համար, իսկ Հայաստանի համար այն ընդգծված տարբերությամբ ծանր տարի էր՝ խոսքը պատերազմի ու դրա հետևանքների մասին է։
Արդյո՞ք այս ամենն այն կարմիր գիծն էր, որ կստիպի մեզ, այսպես ասած՝ խելքներս գլուխներս հավաքել և առաջիկա տարիներին շարունակել հստակ ճանապարհով, զարգացման նպատակադրումներով հասնել ինչ-որ մի կետի կամ գնալ դեպի մի կետ, որի շուրջ մենք կունենանք նաև հանրային կոնսոլիդացիա, քաղաքական ուժերի կոնսոլիդացիա՝ բոլորս կաշխատենք ընդհանուր նպատակի համար․ «Առաջին լրատվական»-ի հարցին ՀԱԿ իրավական հանձնաժողովի ներկայացուցիչ Արմեն Խաչատրյանը պատասխանեց․ «Ամեն անգամ այսպիսի պատմական ծանր իրավիճակներում մենք հետհայացք ենք գցում մեր պատմության վրա ու հասկանում ենք, որ պատմությունից մենք էդպես էլ դասեր չենք քաղել։ Թվում էր, թե Կարսի կորստից հետո մենք երբեք չպիտի գնանք նոր արկածախնդրության, բայց ուղիղ 100 տարի մեզ պետք եղավ, որպեսզի մենք նորից գնանք արկածախնդրության ու կորցնենք հայրենիք։ Սարսափելի է մտածել, որ 100 տարի հետո մենք կարող ենք նորից նույն սխալը թույլ տալ։ Վերջապես մենք իսկապես պե՞տք է հասկանանք, թե ինչ բան է պետությունը․ այն խաղալիք չի, որ երբ ուզես՝ քանդես, երբ ուզես՝ տեսնես, թե մեջն ինչ կա։
Ես այսօր կուզեի հիշել Տեր-Պետրոսյանի խոսքերը․ «Հարյուրավոր ժողովուրդներ կան աշխարհում, որոնք չունեն պետություն, իսկ մենք այն երջանիկներից ենք, որոնք ունեն անկախ պետություն»։ Վերջապես մենք պետք է հասկանանք, որ 21-րդ դարում աշխարհը փոխվել է, փոխվել են մարդիկ, և մենք էլ պետք է փոխվենք ու համապատասխանենք 21-րդ դարի այդ մտածողությանը, ավելի ազատ ու անկաշկանդ ապրենք, պետք է այլ արժեքների համար ապրենք ու այլ արժեքներով ապրենք։ Պետք է հասկանանք, որ գլխավոր խնդիրը թալանչիներին պատժելը չէ, գլխավոր խնդիրը պատմական անարդարություններն ուղղելը չէ, այլ գլխավոր խնդիրը պետք է լինի պետության զարգացումը, ստեղծագործ քաղաքացու համար ստեղծագործ միջավայր ստեղծելը պետք է լինի։ Ի վերջո, մեր ժողովուրդն արժանի է արժանավոր կյանքով ապրելու համար։ Մենք ունենք այդ ինտելեկտուալ պաշարը, որպեսզի լավ ապրենք»։
Մանրամասները՝ տեսանյութում։
