Հունաստանի արտաքին գործերի նախարար Նիկոս Դենդիասը Թուրքիային տարածաշրջանում անդորրը խախտող և «ջիհադիստների տուրիստական գործակալ» է անվանել: Այս մասին նա հայտարարել է Հունաստանի, Կիպրոսի և Հորդանանի արտաքին գործերի նախարարների եռակողմ հանդիպման ժամանակ, հաղորդում է Ekathimerini պորտալը:
Գերատեսչության ղեկավարի խոսքով՝ Անկարան գործում է միջազգային իրավունքի շրջանակներից դուրս և սպառնում է ուժ կիրառել: Այսպես, Թուրքիան սպառնում էր Հունաստանին պատերազմով, եթե նա գործի իր ինքնիշխան իրավունքին համապատասխան և իր տարածքային ջրերը ընդլայնի մինչև 12 ծովային մղոն, հիշեցրել է նա:
Բացի այդ, նախարարը նշել է, որ երկիրը միգրանտներին օգտագործում է որպես քաղաքականության գործիք: «[Թուրքիան] քարոզչություն և կեղծ լուրեր է տարածում, սրում է անվտանգության խնդիրը, ջիհադիստներին Լիբիայից Կովկաս է տեղափոխում, ինչը ես «ջիհադիստների զբոսաշրջային գործակալություն» եմ անվանում և այդպիսով սպառնալիքներ է ստեղծում տարածաշրջանում խաղաղության և կայունության համար», – եզրափակել է Դենդիասը:
Նա հիշեցրել է, որ Աթենքը բազմիցս կոչ է արել Անկարային կառուցողական երկխոսության մեջ մտնել բոլոր այն երկրների հետ, որոնք ընդհանուր արժեքներ ունեն: