Մտահոգության առիթները շատ են, այդ թվում ստորագրված համաձայնագիրը, որը մեզ համար շատ տարօրինակ և բարդ է, բայց գլխավոր խնդիրը, որ մտահոգում է, այն է, որ այդպես էլ չենք կարողանում ռացիոնալ դաշտ տեղափոխել մեր ներքին քաղաքականության, Արցախի հետ կապված հարցերը: Այս մասին «Առաջին լրատվական»-ի հետ զրույցում ասաց քաղաքագետ, Գլոբալիզացիայի և տարածաշրջանային զարգացման կենտրոնի ղեկավար Ստեփան Գրիգորյանը:
Նրա խոսքով՝ իշխանության հասցեին հնչում են մեղադրանքներ, և զարմանալի է, որ իշխանությունները շարունակում են պատասխանել քննադատություններին, արդարանալ և բացատրություններ տալ: «Ես վարչապետին և իր թիմին առաջարկում եմ օրակարգեր առաջ բերել, որոնք օգտակար են հասարակությանը: Փոխադարձ մեղադրանքները տանում են անդունդ… Ռազբորկաները պետք չէ դուրս բերել հասարակություն»,- ասաց Ստեփանյանը՝ հավելելով, որ կառավարման համակարգը պետք է դուրս գա կոլապսից և սկսի աշխատել՝ իրականացնել ճանապարհային քարտեզը, հրատապ լուծում տալ գերիների և անհետ կորած զինվորների խնդրին:
Նրա խոսքով՝ արդիական է նաև Արցախի անկախության հարցը, և պետք է արտգործնախարարությունում առանձին խումբ ստեղծել, որը մեզ համար դրական կարևոր կողմերը կֆիքսի և առաջ կմղի: «Միջազգային հանրությունը հիմա լարված է Ադրբեջանի դեմ, հիմա պետք է հատուկ խումբ ստեղծել, արձանագրել դրական արձագանքները և առաջ տանել»:
Քաղաքագետի կարծիքով՝ պետք է նաև նոր ԸՕ ընդունել, և ստեղծել նոր խորհրդարան. «Այլապես կրկին կունենանք լեգիտիմ, բայց անհաջող խորհրդարան, ինչպիսին հիմա է: Շատ հավանական է, որ արտահերթ ընտրություններն անհրաժեշտություն կդառնան»:
Անդրադառնալով հարցին, թե ով ինչ ստացավ այս պատերազմում, Ստեփան Գրիգորյանն ընդգծեց, որ գլխավոր շահողը Ռուսաստանն է. «Ռուսական զորքը ոչ միայն մտավ Ղարաբաղ՝ կոնֆլիկտի գոտի, այլ նաև Ադրբեջան, այնտեղ պետք է տեղակայվի ռուս-թուրքական մոնիթորինգային կենտրոն: Թուրքիան շահեց, որովհետև պաշտոնապես թուրքական զորքը ներգրավված կլինի մոնիթորինգային կենտրոնում և մշտական ներկայություն կունենա Ադրբեջանում, ինչպե նաև ներգրավվեց Արցախի հարցի լուծման մեջ, շահեց նաև Ադրբեջանը՝ ստացավ յոթ շրջանները, բայց Շուշիի հարցում պարտվեց, քանի որ այնտեղ ռուսական զորքեր են»:
Քաղաքագետի դիտարկմամբ՝ Ադրբեջանը սխալված կլինի, եթե հայկական շքերթի ժամանակ հայ գերիներ քայլեն. «Դա ռազմական հանցագործություն է, որը քաղաքական լուրջ հետևանքների կբերի, դա հունից կհանի միջազգային հանրությանը, և բոլորը կսկսեն ճանաչել Արցախի անկախությունը: Այսօր Գերմանիայի Բունդեսթագում խմորումներ են, կառավարության վրա ճնշում է գործադրվում, որ Ֆրանսիայի նման դիրքորոշում հայտնեն, և եթե Ադրբեջանն իրեն սխալ պահի, կսկսվի Արցախի ճանաչումը: Մերկելը հազիվհազ է կարողանում նրանց զսպել: Հետաքրքիր է, որ Մերկելի խմբակցությունը նրանից պահանջոմ է ճանաչել Արցախի անկախությունը: Եթե Ադրբեջանն այդ քայլին գնա, Մերկելը կճանաչի Արցախի անկախությունը»:
Մանրամասն՝ տեսանյութում:
