Իլհամ Ալիևը հայտարարել է, թե պատրաստ է հանդիպել Հայաստանի վարչապետ Նիկոլ Փաշինյանի հետ, սակայն կարծում է, որ կողմերը հեռու են հարցի կարգավորումից։ Այս մասին Ադրբեջանի նախագահն ասել է ճապոնական Nikkei թերթին տված հարցազրույցում։
«Ռուսաստանի նախագահը ինձ նման հանդիպման չի հրավիրել։ Նման (եռակողմ) հանդիպում Մոսկվայում հնարավոր է, նման հանդիպումներ նախկինում էլ եղել են։ Բայց դա կախված է հանդիպման օրակարգից։ Ցավոք սրտի, Հայաստանի կառավարությունը հեռու է հակամարտության խաղաղ կարգավորման հեռանկարից»,- հայտարարել է Ալիևը։
Ադրբեջանի նախագահը հայտարարել է նաև, թե պատրաստ է Լեռնային Ղարաբաղում ապրող հայերին տալ մշակութային ինքնավարություն։
Ալիևի այս հայտարարություններին «Առաջին լրատվական»-ի հետ զրույցում արձագանքեց Արցախի նախագահ Արայիկ Հարությունյանի՝ արտաքին հարաբերությունների գծով խորհրդական Դավիթ Բաբայանը՝ դրանք որակելով ցինիկ. «Բնական է, որ այս ֆոնին Ռուսաստանից հրավեր չի լինի։ Խնդիրն ի՞նչն է. որպեսզի համապարփակ կարգավորում լինի, ոչ թե խոսենք այնպիսի թեմաների մասին, որոնք ինքնին անընդունելի են։ Ի՞նչ է նշանակում մշակութային ինքնավարություն։ Մենք ունենք անկախ պետականության, թեպետ չճանաչված, կարգավիճակ, բայց ի՞նչ է նշանակում մշակութային ինքնավարություն։ Հիմա արդեն ինքնավարություն էլ չեն ասում, մշակութային ինքնավարությո՞ւն են ուզում տրամադրել։ Առանց այն էլ ինքնավարությունը մեզ համար անընդունելի է։ Այսինքն՝ այսպիսի մոտեցումը հարված է և՛ բանակցային գործընթացին, և՛ նաև Ռուսաստանին»։
Դավիթ Բաբայանի խոսքով՝ Ալիևը միտումնավոր է այսպիսի քաղաքականություն վարում. «Փաստորեն հարվածում է նաև մեր եղբայրական երկրին։ Եթե պետք է մշակութային ինքնավարություն տրամադրեն, էլ ինչի՞ մասին հանդիպենք խոսենք՝ թե ո՞նց են մեզ տալիս մշակութային ինքնավարություն։ Իհարկե, նման բաները շատ լավ հասկանում են նաև Մոսկվայում, ու դրա համար էլ համապատասխան հրավեր չկա։ Եթե հանդիպում է, ապա պետք է քննարկվեն նորմալ հարցեր»։
Մեր զրուցակիցն ընդգծեց՝ հարցն այստեղ Ռուսաստանի հրավերը չէ. «Ռուսաստանը կարող է հրավիրել ու բանակցային գործընթացը շարունակական դարձնել, բայց եթե թեման այն է, որ մեզ պետք է մշակութային ինքնավարություն տան, այդ դեպքում ո՞նց Ռուսաստանը միջնորդի, միջնորդի, որ ի սկզբանե ձախողված միջոցառո՞ւմ կազմակերպի։ Հասկանալի է, չէ՞, որ դա իր վարկանիշին էլ է խփում, ի՞նչ է նշանակում՝ մշակութային ինքնավարություն։ Այսինքն՝ ի՞նչ է, ձե՞ռ են առնում Ռուսաստանին ու մեզ։ Եթե խոսում են խաղաղ կարգավորման վերսկսման մասին՝ դա մի խնդիր է, եթե խոսվում է պատերազմի դադարեցման մասին՝ դա մի խնդիր է, բայց խոսել ինչ-որ մշակութային ինքնավարության մասին՝ սա, կրկնում եմ, հարված է Ռուսաստանի Դաշնությանն ու ԵԱՀԿ Մինսկի խմբի համանախագահության այսքան տարի իրականացված քրտնաջան աշխատանքին»։
Բաբայանի խոսքով՝ Ռուսաստանին ձեռնտու է, որ տարածաշրջանում խաղաղություն ու կայունություն հաստատվի, քանի որ ինքն անմիջապես սահմանակից է տարածաշրջանին, ու կարող է ստացվել այնպես, որ ուզած-չուզած ներգրավվի պատերազմի մեջ. «Հաշվի առնենք, որ կան ազգային փոքրամասնություններ, որ ապրում են Ռուսաստանում և նույն Ադրբեջանում ու ենթարկվում են հալածանքների, օրինակ՝ լեզգիները, որոնք ապրում են Դաղստանում։ Նրանք կարող են գնալ իրենց եղբայրներին օգնելու, ու Ռուսաստանն ուզած-չուզած դառնա այդ պատերազմի կողմ՝ նույնիսկ չուզենալով ներգրավվել այդ ամենի մեջ։ Հետևաբար պետք է հասկանանք, որ Ռուսաստանն իսկապես շահագրգռված է խաղաղության և կայունության հաստատման մեջ»։
