Գերմանիան այս գիշեր հայտ է ներկայացրել ՄԱԿ ԱԽ-ում շտապ խորհրդակցություններ անցկացնելու պահանջով, քանի որ լրջորեն մտահոգված է Սիրիայում տեղի ունեցող սպանդի կապակցությամբ, երբ կառավարական զորքերը Համա և մի շարք այլ բնակավայրերում իրականացրած հարձակման ժամանակ սպանել են առնվազն 140 մարդու: Այս մասին հաղորդում է «Ազատություն» ռադիոկայանը: Նախատեսվում է, որ խորհրդակցությունները տեղի կունենան երկուշաբթի օրը:
Ականատեսների վկայությամբ՝ նախորդ օրը ապստամբների հիմնական կենտրոններից համարվող Համա քաղաք ներխուժած զրահատեխնիկան կրակ է բացել քաղաքացիական բնակչության վրա՝ սպանելով առնվազն 140 մարդու: Աննախադեպ այս ոճրագործությունը դատապարտել են ԱՄՆ-ը և ԵՄ-ն՝ կոչ անելով խստացնել պատժամիջոցները: ՄԱԿ-ի գլխավոր քարտուղար Բան Կի Մունը բռնությունը անհապաղ դադարեցնելու կոչ է արել:
Համացանցում հայտնվել են ահասարսուռ կադրեր՝ սպանված երեխաների մարմիններով, Համայում կայանած ծանր զինտեխնիկայով: Կադրերից մեկում մի խումբ մարդիկ գետն են նետում արնաշաղախ մարմիններ: Նկարագրության մեջ նշվում է, որ նետողները «Մուսուլման եղբայրներ» կազմակերպությունից են:
