ՀՀ Ազգային ժողովի պատգամավորները արցախահայության անվտանգության ապահովման ճանապարհ են համարում Արցախի միջազգային ճանաչումը:
ԱԺ «Իմ քայլը» խմբակցության պատգամավոր, ադրբեջանագետ Տաթևիկ Հայրապետյանը նշեց, որ իրականում արցախահայությունը կանգնած է էքզիստենցիալ լուրջ սպառնալիքի առաջ՝ ստեղծված Թուրքիայի, Ադրբեջանի և ահաբեկիչների կողմից:
«Միջազգային ճանաչումը կարող է որոշակի զսպիչ միջոց և հնարավորություն դառնալ արցախահայության էքզիստենցիալ անվտանգության ապահովման ճանապարհին: Այդ առումով մենք փորձում ենք ներկայացնել իրավիճակը և ցույց տալ, թե որն է ելքը: Միջազգային հանրությունն այս պարագայում մի բան կարող է անել՝ ճանաչել Արցախի անվտանգության ինքնորոշման իրավունքն և անկախությունը»,- նշեց պատգամավորը:
Անդրադառնալով հարցին, թե Խորհրդարանն այդ ուղղությամբ ինչ քայլեր է ձեռնարկում, Հայրապետյանն ասաց, որ իրենք ակտիվորեն միջազգային գործընկերներին են ուղարկել ՀՀ ԱԺ նախագահ Արարատ Միրզոյանի ուղերձն այն մասին, որ Արցախի ինքնորոշման իրավունքի միջազգային ճանաչումը արցախահայության կյանքի իրավունքի և ֆիզիկական անվտանգության ապահովման միակ ճանապարհն է, և աշխարհը պետք է առերեսվի սրա հետ։
«Եթե Ադրբեջանն այս գործելաոճը շարունակի, ապա ես տեսնում եմ հնարավորություններ, որ միջազգային հանրությունը ևս կգա այն համոզման, որ միակ ճանապարհը Արցախի անկախության ճանաչումն է: Ադրբեջանն էլ այս պահին իր ծրագրերից ակնհայտորեն չի հրաժարվում: Այս պարագայում շատ եմ կարևորում Ժնևի քաղաքային խորհրդի որոշումը (Ժնևի քաղաքային խորհուրդը հոկտեմբերի 7-ին 49 կողմ, 18 ձեռնպահ և 2 դեմ ձայներով ընդունել է Ադրբեջանի ռազմական ագրեսիան դատապարտելու, Ղարաբաղի հայերի ինքնորոշման իրավունքը ճանաչելու և Ալիևների կլանի ակտիվները Շվեյցարիայում սառեցնել պարտադրելու մասին բանաձևը)»,- նշեց ԱԺ պատգամավորը:
ՀՀ Ազգային ժողովի «Իմ քայլը» խմբակցության պատգամավոր, Արտաքին հարաբերությունների մշտական հանձնաժողովի նախագահ Ռուբեն Ռուբինյանի կարծիքով նույնպես արցախահայության կայուն անվտանգության ապահովման ճանապարհը Արցախի միջազգային ճանաչումն է:
«Պետք է դիվանագիտական բոլոր ջանքերն ուղղվեն այդ ուղղությամբ՝ և Խորհրդարանի, և Արտաքին գործերի նախարարության, և Սփյուռքի, և ընդհանրապես բոլոր մակարդակներով»,- նշեց Ռուբինյանը:
Հայաստանի, Ռուսաստանի և Ադրբեջանի ԱԳ նախարարները հայտարարել են, որ հոկտեմբերի 10-ի ժամը 12:00-ից սկսած Լեռնային Ղարաբաղի հակամարտության գոտում հաստատվում է մարդասիրական նպատակով կրակի դադարեցման մասին՝ ռազմագերիների և այլ պահպանման տակ գտնվող անձանց ու զոհվածների մարմինների փոխանակման նպատակով՝ Կարմիր խաչի միջազգային կոմիտեի (ԿԽՄԿ) միջնորդությամբ և չափորոշիչներին համապատասխան: «Հրադադարի ռեժիմի կոնկրետ պարամետրերը կհամաձայնեցվեն լրացուցիչ։ Ադրբեջանի Հանրապետությունը և Հայաստանի Հանրապետությունը ԵԱՀԿ Մինսկի խմբի համանախագահների միջնորդությամբ կարգավորման հիմնարար սկզբունքների հիման վրա ձեռնամուխ են լինում առարկայական բանակցությունների՝ խաղաղ կարգավորմանը շուտափույթ հասնելու նպատակով:
Կողմերը հաստատում են բանակցային գործընթացի ձևաչափի անփոփոխելիությունը»,-նշվել է հայտարարության մեջ։
