Թուրքական Ihlas լրատվական գործակալության փոխանցմամբ՝ Ռուսաստանի նախագահ Դմիտրի Մեդվեդև պլանավորում է այցելել Թուրքիա՝ քննարկելու համար Հակահրթիռային պաշտպանության համակարգի (ՀՀՊ) տարրերի տեղակայման հարցի քննարկման համար։ Այս մասին Անկարայում Ռուսաստանը դեսպանատանը տեղի ունեցած մամլո ասուլիսի ժամանակ հայտարարել է Մեդվեդևի «հրթիռային դեսպան», ՆԱՏՕ-ում Ռուսաստանի մշտական ներկայացուցիչ Դմիտրի Ռոգոզինը։
Վերջինս նշել է. «Թուրքիան տարածաշրջանի առաջատար երկիրն է, ՆԱՏՕ-ի կարևոր դաշնակիցը և մեր ռազմավարական գործընկերը։ ՀՀՊ-ի տեղակայման վերաբերյալ Թուրքիայի դիրքորոշումը շատ մեծ նշանակություն ունի։ Իրանին հոլիվուդյան ոճով ներկայացնելը ոչ մի կապ չունի ռեալ իրավիճակի հետ։
Մենք դեմ ենք Սև ծովում օտար ռազմանավերի ներկայությանը։ Այդ պատճառով էլ անհրաժեշտ է, որ Թուրքիան երկար մտածի՝ ՀՀՊ-ի հարցում իր որոշումը հայտնելուց առաջ։ Այդ որոշումը մեծապես առնչվում է Ռուսաստանի հետ»։
Հիշեցնենք, որ նախորդ տարվա հոկտեմբերի 16-ին թուրքական Akşam թերթը գրել էր, որ Թուրքիայի հարավ-արևելքում տեղակայվելու է X-Band տիպի ռադիոտեղորոշիչ կայան (ՌՏԿ), որն ունի 116 մետր երկարություն, 85 մետր բարձրություն, 50,000 տոննա ծանրություն, 75-85 հոգանոց անձնակազմ: 900 միլիոն դոլարանոց այս ՌՏԿ-ն ունակ է մոնիթորինգ անցկացնել մինչև 5000 կիլոմետր շառավղով:
Իսկ նոյեմբերի 22-ին թուրքական Sabah թերթը գրեց. «Լիսաբոնյան գագաթաժողովում վճռվել է Թուրքիայի տարածքում տեղակայել 2 ՌՏԿ, որոնցից մեկը տեղակայվելու է Սև ծովի արևելյան հատվածում, իսկ երկրորդը` Հարավարևելյան Անատոլիայում: Դրանցից յուրաքանչյուրը մոնիթորինգ է անցկացնելու հազար կիլոմետր շառավղով: Այդ ՌՏԿ-ները Եվրոպան պաշտպանելու են իրանական հրթիռներից: ՌՏԿ-ների տեղակայումը վերոնշյալ վայրերում կարևորվում է նրանով, որ դրանք հնարավորինս մոտ գտնվեն թշնամական (իրանական) հրթիռների արձակման վայրերին»:
Ներկայումս չի բացառվում, որ ՌՏԿ-ն կարող է տեղակայվել Վրաստանի տարածքում։
