ԱՄՆ նախագահ Դոնալդ Թրամփը չեղարկել է Կոնգրեսի համար հետախուզական ճեպազրույցները՝ Ռուսաստանի հետ իր կապերի մասին տեղեկությունները թաքցնելու նպատակով: Այս մասին հայտարարել է Դեմոկրատական կուսակցությունից ԱՄՆ նախագահի թեկնածու Ջո Բայդենը, հաղորդում է «ՌԻԱ Նովոստի»-ն:
Նրա խոսքով, պետության ներկայիս ղեկավարը հույս ունի, որ ՌԴ նախագահ Վլադիմիր Պուտինը կօգնի նրան վերընտրվել ևս մեկ ժամկետով: Բայդենը վստահ է, որ Պուտինը կթաքցնի Միացյալ Նահանգները բազմաթիվ ճգնաժամերից դուրս բերելու հարցում Թրամփի սարսափելի ձախողումները:
Դեմոկրատը նաև շեշտել է, որ Թրամփը չի ցանկանա, որ ամերիկացի ժողովուրդը իմանա պետության գործող ղեկավարի վերընտրվելու հետ կապված Պուտինի կողմից ձեռնարկվող քայլերի մասին: Նա հավելել է, որ Թրամփի վարած քաղաքականությունը հիանալի նվեր է Կրեմլի համար:
Բայդենը նշել է, որ նախագահի «թեթև ձեռքով» ամերիկյան ընտրություններին այժմ փորձում է միջամտել նաև Չինաստանը:
