Ազգային Ժողովի «Իմ քայլը» խմբակցության պատգամավոր Արտակ Մանուկյանը համաձայն չէ այն տնտեսագետների կարծիքների հետ, ովքեր կանխատեսում են, որ տնտեսական առկա ճգնաժամի հետևանքով Հայաստանը 2020թ-ը կփակի ընդհուպ երկնիշ տնտեսական անկմամբ:
Արտակ Մանուկյանը նշում է՝ այս ժամանակաշրջանը խոսում է այն մասին, որ տարեվերջին կունենանք 4 տոկոսին մոտ տնտեսական անկում և այս թվից ավել խորացման հավանականությունը բավականին ցածր է:
«Նախ մի շարք երկրներում՝ այդ թվում նաև Հայաստանում տնտեսական կյանքը համեմատաբար աշխուժացել է, տնտեսությունը գնալով շնչում է: Բացի այդ՝ հիմա մեզ մոտ նաև գյուղատնտեսական սեզոն է և պետությունը բավականաչափ կարևոր քայլեր է կատարել այս ուղղությամբ, որովհետև գյուղատնտեսությունն այն կարևոր ոլորտներից է, որը թեև փոքր, բայց և այնպես դրական միտումներ է ունեցել և այդ միտումները, ըստ իս, առաջիկայում էլ շարունակական կլինեն, ինչպես նաև շինարարության ոլորտը: Վերջինի դեպքում, ճիշտ է՝ ընթացիկ տարվա առաջին կիսամյակի տվյալներով՝ ավելի քան 20 տոկոսով անկում ենք ունեցել, բայց հիմա այս մասով փոփոխություններ պիտի արձանագրենք, որովհետև վարչապետն էլ է հանձնարարել ինտենսիվ ձևով կապիտալ շինարարական ծրագրեր իրականացնել: Վերամշակվող արդյունաբերության դեպքում էլ հենքը հենց գյուղատնտեսական արտադրանքն է, որի կապակցությամբ, ինչպես արդեն նշեցի, տարին բավականաչափ հաջող և բերքառատ է լինելու: Այսինքն՝ սրանք այն կարևոր ուղղություններից են, որոնց վրա հիմնվելով, կարծում եմ, որ պեսիմիստական կանխատեսումների համար հիմքեր չկան»,- «Առաջին լրատվական»-ի հետ զրույցում ընդգծեց պատգամավորը:
Մանրամասները՝ տեսանյութում: