Երեկ ԱՄՆ Կոնգրեսի համապատասխան հանձնաժողովը, որը պատասխանատու է միջազգային օգնությունների տրամադրման համար, կողմ է քվեարկել Հայաստանին տնտեսական օգնություն ցուցաբերելու օրինագծին: Օգնության ընդհանուր ծավալը կազմում է 40 միլիոն դոլար, որը հատկացվելու է 2012 թ. ֆինանսական տարում: Այս մասին հաղորդում է Asbarez.com կայքը՝ հղում անելով Ամերիկայի Հայ դատի գրասենյակին:
Այս գործըթնացներին մոտ կանգնած կոնգրեսական աղբյուրներն ասում են, որ սահմանվել է նաև ռազմական օգնության հավասարակշռություն Հայաստանի և Ադրբեջանի միջև, սակայն չի նշվում, թե որքան օգնություն է ցուցաբերվելու կողմերին: Չի նշվում նաև Լեռնային Ղարաբաղին օգնություն ցուցաբերելու մասին, սակայն աջակցություն է հայտնվել բանակցային գործընթացին:
Հիշեցնենք, որ այս տարվա մայիսի 20-ին կոնգրեսական Ֆրանք Փելոունը ներկայացրել իր առաջարկները, որոնց աջակցել էին 28 կոնգերսականներ։ Համաձայն դրանց՝ Հայաստանին օգնություն ցուցաբերելիս անհրաժեշտ է կատարել հետևյալ քայլերը.
• Առնվազն 60 միլիոն տնտեսական օգնության սահմանում Հայաստանի համար,
• Առնվազն 10 միլիոն դոլարի օգնություն Լեռնային Ղարաբաղի զարգացման ծրագրերին,
• Չեզոքություն Հայաստանին և Ադրբեջանին ռազմական օգնություն ցուցաբերելիս,
• Լեռնային Ղարաբաղ-ԱՄՆ շփումներում խոչընդոտների վերացում,
• Լեռնային Ղարաբաղի՝ ԵԱՀԿ Մինսկի խմբի բանակցային սեղան վերադառնալու անհրաժեշտություն,
• Առնվազն 10 միլիոն դոլարի ռազմական օգնության ցուցաբերում Հայաստանին:
