Ապրիլյան պատերազմի վերաբերյալ Սերժ Սարգսյանի «անկեղծ զրույցը» այդքան էլ անկեղծ չի ստացվել՝ հաշվի առնելով այն հայտարարությունները, որ արել է Սարգսյանը իր գրասենյակի տարածած տեսանյութերում:
Բանն այն է, որ դա ավելի շատ նման է հերթապահ զրույցի, քան անկեղծի: Ոչ այն պատճառով, որ Սերժ Սարգսյանը չի հավատում իր իսկ խոսքերին: Գուցե նա հավատում է անկեղծ, և գուցե այդ առումով նա իսկապես էլ անկեղծ է՝ այն տեսանկյունից, թե ինչպես է գնահատում իրադարձությունները: Խոշոր հաշվով, ապրիլյան քառօրյան իրապես Ադրբեջանի ռազմաքաղաքական պարտությունն էր: Դա չի նշանակում, որ մենք չպետք է դիտարկենք մի քանի դիրքային կորստի պատճառները, ուսումնասիրենք հանգամանքները:
Ի վերջո, պետք է արձանագրել, որ տավուշյան հաղթանակը գուցե հենց արդյունքներից մեկն էր՝ ապրիլյան քառօրյան լավ ուսումնասիրելու և հետևություններ անելու արդյունքներից մեկը: Մենք, ի դեպ, հեռու ենք մտքից, թե այդ հետևությունը և ուսումնասիրությունը արվել է միայն վերջին երկու տարիներին: Ամենևին, կասկած չկա, որ հայկական զինուժում հետևություններն արվել են ապրիլյանից անմիջապես հետո, իսկ գուցե նույնիսկ հենց մարտերի ընթացքում:
Ապրիլյանի առումով անկեղծության հարցը, սակայն, բոլորովին այլ տեղում է՝ ռազմաքաղաքական իրողությունների լայն շրջանակում, որովհետև հակառակ պարագայում կստացվի, որ մենք ռեգիոնալ լայն նշանակության իրավիճակն ու զարգացումները ենթարկում ենք ընդամենը մեխանիկական վերլուծության և քննարկման՝ այսքան ենք կորցրել, թե այսքան, 80-ականների էր զենքը, թե 90-ականների, հաղթանակ էր, թե կորուստ, և այլն, և այլն: Այստեղ է, որ Սերժ Սարգսյանը չի անկեղծացել, որովհետև չի շոշափել հենց այդ դրվագները և հարցերը՝ սկսած հայաստանյան ներքին և արտաքին քաղաքական անցուդարձից ու հանգամանքներից՝ այդ փուլի, մինչև Հայաստանի, այսպես ասած, ռազմավարական դաշնակից և այդ փուլում Ադրբեջանի մահաբեր սպառազինության մոտ 80 տոկոսի մատակարար Ռուսաստանի քաղաքականություն:
Սերժ Սարգսյանը չի անկեղծացել, որովհետև չի շոշափել այդ թեմաները: Այստեղ է ապրիլյան քառօրյայի «անկեղծության պահը»՝ թե՛ Սերժ Սարգսյանի, թե՛ ընդհանրապես հայաստանյան որևէ քաղաքական դերակատարի համար: Այստեղ է, որ հարցերն ու պատասխանները, քննարկումները, գնահատականները պետք է օգնեն մեր հանրությանը բացել քառօրյայի ամբողջ պատկերը, Հայաստանի ու Արցախի դեմ ադրբեջանական սանձարձակության և գրոհի, այսպես ասած, անատոմիան:
Լուսանկարը՝ Armeniasputnik-ի
