Մարտի 1-ի գործով դատական նիստն այսօր հետաձգվել է մեղադրյալներից մեկի փաստաբանի չներկայանալու պատճառով: Թեմայի շուրջ «Առաջին լրատվական»-ի հետ զրույցում փաստաբան Սեդա Սաֆարյանը նշեց, որ պարզ չէ, թե ինչու չի ներկայացել Յուրի Խաչատուրովի փաստաբան Միհրան Պողոսյանը. «Դատական նիստի մեկնարկից 15 րոպե առաջ նա դիմում է ներկայացրել դատարան՝ տեղեկացնելով, որ հանկարծակի բան է եղել, և այդ «հանկարծակի դեպքին» մեկնաբանություն չտրվեց»:
Սեդա Սաֆարյանի խոսքով՝ դեռևս նախորդ նիստից նախապատրաստական աշխատանքներ էին տարվում, որ այս նիստը ձախողվի: Փաստաբանի դիտարկմամբ՝ Քոչարյանի շահերի հետ համընկնում են դատական ձգձգումները: «Մարտի 1-ի գործով դատական նիստերը ձախողվում են, սկսվել է «տաֆտալոգիա»,- ընդգծեց Սեդա Սաֆարյանը:
Փաստաբանի խոսքով՝ ավելի քան մեկ տարի է Մարտի 1-ի գործը դոփում է զրո մակարդակի վրա, դատական նիստերում գործի բուն էության վերաբերյալ ոչինչ չի քննվել. «Որևէ մեկը չի ասել, թե ինչու են այդ միջնորդությունները ներկայացվել: Միջնորդությունները ներկայացնելու ձև կա, կարգ կա, ժամանակ կա և քննարկման կարգ կա, այս ամենը խախտվել է… Տպավորություն կա, որ բոլորը լուռ համաձայնություն ունեն»:
Սեդա Սաֆարյանը նաև նշեց, որ Հայաստանում կոռուպցիա կա և կշարունակի լինել, քանի դեռ շատերի ձեռքին գումար կա. «Յոթ-ութ խոշոր փողատերեր պատասխանատվության չեն ենթարկվում»:
Մանրամասն՝ տեսանյութում: