Միացյալ Նահանգները պատժամիջոցներ է սահմանել Չինաստանի չորս նախկին և ներկա պաշտոնյաների նկատմամբ, որոնք, ըստ Վաշինգտոնի, մասնակից են ույգուրների իրավունքների խախտմանը: Սահմանափակումները մտցվել են «Մագնիտսկիի ակտի» շրջանակում, հաղորդում է «Ազատություն» ռադիոկայանը՝ հղում անելով ԱՄՆ ֆինանսների նախարարությանը:
Պատժամիջոցները նախատեսում են, մասնավորապես, այդ անձանց ակտիվների սառեցում Միացյալ Նահանգների տարածքում, գործարար շփումների արգելք և վիզային սահմանափակումներ:
Հունիսի 18-ին ԱՄՆ նախագահ Դոնալդ Թրամփը օրենք է ստորագրել Չինաստանի Սինցզյան-Ույգուրական ինքնավար շրջանում ույգուրների և այլ մահմեդականների ճնշման համար պատժամիջոցներ կիրառելու վերաբերյալ: Մարդու իրավունքների ոտնահարումների շարքում Վաշինգտոնը նշում է ույգուրների համար նախատեսված հատուկ ճամբարները, որտեղ նրանց ենթարկում են գաղափարական մշակման և հարկադրում ծանր աշխատանքի:
Պեկինը պնդում է, որ այդ հաստատությունները («քաղաքական վերադաստիարակության ճամբարներ») բանտեր չեն, այլ մասնագիտական վերապատրաստման կենտրոններ են, որոնք ստեղծվել են ծայրահեղականությանը և ահաբեկչությանը հակազդելու համար: Այնուամենայնիվ, այս ճամբարներում պահվող մարդիկ պատմել են դաժան, համարյա բանտային ռեժիմի, հարկադիր աշխատանքի և կոմունիստական քարոզչության շուրջօրյա ազդեցության մասին: Բացի այդ, մարդկանց նպանատիպ ճամբարներ են ուղարկում անորոշ ժամանակով՝ բաժանելով հարազատներից և չտեղեկացնելով, թե երբ կարող են վերադառնալ տուն: