Երկրի նախկին նախագահ Պետրո Պորոշենկոյի և ԱՄՆ նախկին փոխնախագահ Ջո Բայդենի խոսակցությունների գաղտնալսման գործով Ուկրաինայում փորձաքննություն է նշանակվել: Այս մասին հայտարարել է Ուկրաինայի գլխավոր դատախազ Իրինա Վենեդիկտովան:
Ըստ նրա, ներկայումս ճշտվում են ձայնագրության հանգամանքները, այն անձինք, ովքեր ներկա են եղել դրա իրականացման պահին, կիրառվող տեխնիկական միջոցները և ձայները պարզելու հնարավորությունը:
Նա ընդգծել է, որ գործը քննվում է օրենքի շրջանակներում, որպեսզի խուսափեն քաղաքականացվելուց՝ ԱՄՆ նախագահի ընտրությունների շեմին:
Ընդ որում գլխավոր դատախազը չի բացառել այս գործով ամերիկացի իրավապահների հետ համագործակցությունը, եթե ուկրաինացի քննիչները եւ դատախազները դրա անհրաժեշտությունն ունենան:
Ավելի վաղ հայտարարվել էր, որ Գերագույն Ռադայի պատգամավոր Անդրեյ Դերկաչը ձայնագրություն էր հրապարակել, որում, ենթադրաբար, ԱՄՆ նախկին փոխնախագահ Ջո Բայդենը այն ժամանակ Ուկրաինայի նախագահի պաշտոնը զբաղեցնող Պետրո Պորոշենկոյին 1 մլրդ դոլար է առաջարկում գլխավոր դատախազ Վիկտոր Շոկինի հրաժարականի դիմաց:
