Մայիսի 29-ին օսմանյան սուլթան Մեհմեթ Ֆաթիհի (Նվաճող) կողմից Կոստանդնուպոլսի գրավման 567-րդ տարեդարձի կապակցությամբ Ստամբուլի Սբ․ Սոֆիայի (Այա Սոֆիա) տաճարում ընթերցվել են հատվածներ Ղուրանից՝ մահմեդականների սուրբ գրքից։
Հույները դրան շատ բացասական են արձագանքել, քանի որ մոտ 1000 տարի (մինչև 1453թ․) Սբ․ Սոֆիայի տաճարը Բյուզանդիայի ու աշխարհի ամենամեծ ուղղափառ քրիստոնեական տաճարն է եղել, ինչպես նաև՝ հունական տիեզերական պատրիարքի նստավայրը։
Թուրքիայի նախագահ Ռեջեփ Թայիփ Էրդողանի թույլտվությամբ Այա Սոֆիայում տեղի ունեցած ղուրանյան ընթերցանությունից հետո զայրացած հույները սոցցանցերում «Այա Սոֆիան կրկին մերն է լինելու» խորագրով արշավ են սկսել։
Երեկոյան թուրք-հունական սահմանի մոտ գտնվող հունական Դիմետոկա քաղաքում 500 տարի առաջ կառուցված ու այժմ չգործող օսմանյան մզկիթի մինարեթից Հունաստանի դրոշն են կախել։ Դիմետոկայի քաղաքապետը, սակայն, առավոտյան կարգադրել է իջեցնել անհայտ անձանց կողմից կախված դրոշը։
Հունական ոստիկանությունը դեպքի հանգամանքները պարզելու համար հետաքննություն է սկսել։
