ԱՄՆ նախագահ Դոնալդ Թրամփը կրկին քննադատության և ծաղրի է ենթարկվել կորոնավիրուսի բուժման մեթոդների վերաբերյալ իր արած հայտարարությունների կապակցությամբ։ Այս անգամ նա հետաքրքրվել է, թե արդյոք չի կարելի COVID-19-ով հիվանդներին ախտահանող միջոցներ ներարկել կամ ինչ-որ մի կերպ արևային լույս մտցնել օրգանիզմի մեջ, հաղորդում է Washington Post պարբերականը։ Բժիշկները շտապել են նախազգուշացնել քաղաքացիներին նման «բուժման» վտանգների մասին։
Ամեն բան սկսվել է նրանից, որ ԱՄՆ ազգային անվտանգության նախարարության գիտա-տեխնիկական բաժնի ղեկավար Բիլ Բրայանը SARS-CoV-2 կորոնավիրուսի վերաբերյալ զեկույցով է հանդես եկել, նշելով, որ վիրուսը ավելի քիչ է ապրում խոնավ միջավայրում և բարձր ջերմաստիճանների տակ։
Այդ ժամանակ Թրամփի մոտ հարց է ծագել, թե չի՞ կարելի արդյոք արևի լույսը ինչ-որ կերպ «օրգանիզմ մտցնել»։ Այնուհետև նա ավելացրել է, որ օրգանիզմ կարելի է նաև ախտահանող միջոցներ ներարկել։
Բժիշկները շտապել են հանրությանը տեղեկացնել, որ Թրամփի առաջարկություններն այնքան էլ լավ գաղափար չեն, ավելին՝ դրանք վտանգավոր են և կարող են մահացու լինել։
