Արցախյան ազատամարտի վետերանների միության նախագահը, ինչպես նաև Հայաստանում գործող հասարակական, քաղաքական, ռազմահայրենասիրական կազմակերպությունների կոմիտեն այսօր Արցախի ազատամարտի ինքնապաշտպանական գործողությունների հրամանատարների անունից հանդես եկան հայտարարությամբ՝ ներկայացնելով ղարաբաղյան հարցի կարգավորման գործընթացի վերաբերյալ իրենց դիրքորոշումը. «Մենք, վերագնահատելով հատկապես հարավկովկասյան տարածաշրջանում գերտերությունների շահերի ընդարձակմանը կամ պահպանմանը միտված պահանջադրումների շրջանակներում Ղարաբաղյան հակամարտության խաղաղ կարգավորման բանակցային գործընթացներում միտված երեք գերակա սկզբունքներով արված առաջարկությունները, դրան զուգահեռ՝ թուրք-ադրբեջանական կողմից ակնհայտ պատերազմի վերսկսման սպառնալիքների ուղեկցությամբ արդեն իսկ Կազանամ ներկայացված 10 նոր պահանջագրումները և թելադրանքների անհերքելի փաստի առկայությունը, ինչպես նաև Եվրոխորհրդի որոշակի անդամ պետությունների ներկայացուցիչների կողմից հայ-թուրքական, հայ-ադրբեջանական և ղարաբաղյան հակամարտության իրողության վերաբերյալ անհիմն և իրականությունը գլխիվայր խեղաթյուրող մեկնաբանությունները և տրված գնահատականները, պահանջում ենք ԵԱՀԿ Մինսկի խմբի համանախագահ երկրներից վերանայել խնդրի լուծման համար առաջադրված երեք սկզբունքներն ու հարցը տեղափոխել իրավական դաշտ, ՄԱԿ-ից՝ հրաժարվել չուսումնասիրված և չհիմնավորված խնդիրը քննարկման առարկա դարձնելու և հոգևոր համերաշխության հիման վրա բանաձևեր ընդունելու վարկաբեկիչ պրակտիկայից, Եվրախորհրդին կոչ ենք անում կասեցնել ներթափանցող գռեհիկ ապատեղեկատվության զարգվածային հոսքը, իսկ «Քեմալական Թուրքիայից» և Ադրբեջանից պահանջում են դադարեցնել ցեղասպանության, տեղահանման և ռասիզմի բարբարոս քաղաքականության անհեռանկար գործելաոճը։
Հայաստանի Հանրապետության նախագահից պահանջում ենք.
ա) Ղարաբաղյան հակամարտության բանակցություններում հրաժարվել Մադրիդյան և այլ որակի՝ անցյալում պարտադրված և իրականության խեղաթյուրված ձևակերպումներից: Բանակցություններ վարել միմիայն Ղարաբաղյան կողմի պարտադիր մասնակցությամբ և վերը նշված փաստական իրողություններից բխող դիրքերից:
բ) անհապաղ ետ կանչել հայ-թուրքական արձանագրությունների ստորագրությունները և չեղյալ հայտարարել:
գ) Պատերազմի վերսկսման հիստերիա սփռող, պատերազմ տենչացող Ադրբեջանին և տարածաշրջանի այլ՝ թշնամաբար տրամադրված պետությունների անհագ ախորժակը մեկընդմիշտ փակելու համար ցանկացած տեղանքով հարմար զորավարժությունների ժամանակ ցուցադրենք մեր նորագույն նվաճումներից գոնե մեկի կործանարար կարողությունները:
դ) Մենք բոլորս միասնական կերպով պատրաստակամ ենք ցանկացած պահին անշեղ և մեծագույն պատասխանատվությամբ կատարելու երկրի գերագույն գլխավոր հրամանատարի բոլոր կարգի հրամանները:
«Գոյամարտ» համազգային կուսակցության նախագահ Սերժ Ղազարյանը ու «Փառապանծ» ազատամարտիկների ռազմահայրենասիրական միության նախագահ Գրիշա Սարգսյանը նաև կոչ արեցին. «Ով Հայ ժողովուրդ, մենք 20 տարի է՝ անասելի զրկանքների գնով հզորացրել և հզորացնում ենք մեր երկրի բանակն ու պաշտպանությունը, եկել է պահը միասնական ջանքերով հզորացնելու մեր առաջ ծառացած այլ կարևորագույն ներքին և արտաքին, ինչպես նաև համազգային կառույցների ընդլայնման առաջնահերթ խնդիրները»:
