ՀՀ առողջապահության նախարար Արսեն Թորոսյանը հայտարարել է, որ կառավարությանն առաջարկելու է երկարաձգել արտակարգ դրության ռեժիմը։ Այս տեղեկությունը հաստատել է նաև ԱԺ պետաիրավական հանձնաժողովի անդամ Սիսակ Գաբրիելյանը՝ նշելով, որ քննարկվում է ևս մեկ ամսով սահմանափակումները երկարաձգելու հարցը։
Նշենք, որ արտակարգ դրության ռեժիմի երկարաձգման վերաբերյալ նախագիծն արդեն իսկ հրապարակված է։
Այս ֆոնին, սակայն, որոշ իրավաբաններ նշում են, որ արտակարգ դրության ռեժիմը չի կարող երկարաձգվել, քանի որ «Արտակարգ դրության իրավական ռեժիմի մասին» օրենքի 5-րդ հոդվածի 1-ին մասի համաձայն՝ Հայաստանի Հանրապետության ամբողջ տարածքում հայտարարվող արտակարգ դրության ժամկետը չի կարող գերազանցել 30 օրը, իսկ առանձին տարածքներում՝ 60 օրը:
Հետևաբար, ամբողջ Հանրապետության տարածքում նույն ռեժիմի երկարաձգումն օրենքով այլևս անհնար է։
Մասնավորապես, նման պնդում էր արել ԱԺ «Լուսավոր Հայաստան» խմբակցության ղեկավար Էդմոն Մարուքյանը։ Նա «Ֆեյսբուքում» գրառում էր կատարել. «Մամուլում լուրեր են շրջանառվում այն մասին, որ կառավարությունում կա նախագիծ ևս 30 օրով արտակարգ դրությունը երկարացնելու վերաբերյալ: Իրազեկում եմ Ձեզ, որ «Արտակարգ դրության իրավական ռեժիմի մասին» օրենքի 5-րդ հոդվածի 1-ին մասի համաձայն՝ Հայաստանի Հանրապետության ամբողջ տարածքում հայտարարվող արտակարգ դրության ժամկետը չի կարող գերազանցել 30 օրը, իսկ առանձին տարածքներում` 60 օրը: Հետևաբար, ամբողջ Հանրապետության տարածքում նույն ռեժիմի երկարաձգումն օրենքով այլևս անհնար է»։
Նշենք, սակայն, որ նույն օրենքի 5-րդ հովվածի երկրորդ մասը սահմանում է, որ եթե արդեն իսկ հայտարարված արտակարգ դրության ժամկետների ավարտը չեն վերացել այն հանգամանքները, որոնք հիմք են հանդիսացել արտակարգ դրություն հայտարարելու համար, արտակարգ դրության ժամկետը կարող է երկարաձգվել Հայաստանի Հանրապետության կառավարության որոշմամբ։
«Թեև «Արտակարգ դրության իրավական ռեժիմի մասին» ՀՀ օրենքի 5-րդ հոդվածի համաձայն՝ Հայաստանի Հանրապետության ամբողջ տարածքում հայտարարվող արտակարգ դրության ժամկետը չի կարող գերազանցել 30 օրը, իսկ առանձին տարածքներում` 60 օրը, միևնույն ժամանակ, նույն հոդվածը նախատեսում է, որ եթե մինչև նշված ժամկետների ավարտը չեն վերացել այն հանգամանքները, որոնք հիմք են հանդիսացել արտակարգ դրություն հայտարարելու համար, արտակարգ դրության ժամկետը կարող է երկարաձգվել Հայաստանի Հանրապետության կառավարության որոշմամբ` սույն օրենքով արտակարգ դրություն հայտարարելու համար սահմանված կարգով և սույն հոդվածի 1-ին մասով սահմանված ժամկետները չգերազանցող ժամկետներով: Կարծում եմ, որ նշված նորմերի համակարգային վերլուծությունը ենթադրում է, որ եթե չեն վերացել արտակարգ դրություն հայտարարելու համար հիմք հանդիսացած հանգամանքները, արտակարգ դրության ժամկետը երկարաձգելու հարցը կարելի է քննարկել»,- «Առաջին լրատվական»-ի հետ զրույցում ասաց սահմանադրագետ Անահիտ Մանասյանը։
Նշենք, որ արտակարգ դրության երկարաձգումը չի կարող ավելի լինել, քան օրենքով սահմանված ժամկետը, այսինքն՝ ևս 30 օրով։
Լուսանկարը՝ panorama.am-ի