Իտալիայի իշխանությունները մտավախություն ունեն, որ երկրի հարավում մաֆիան կարող է անկարգություններ և խռովություններ հրահրել՝ կորոնավիրուսի պատճառով, գրում է իսպանական ABC պարբերականը:
Պարբերականի լրագրողը հղում է կատարում հատուկ Իտալիայի վարչապետ Ջուզեպե Կոնտեի և երկրի ներքին գործերի նախարարի համար պատրաստված գաղտնի զեկույցին, որում ասվում է, որ Իտալիայի հարավում «ինքնաբուխ և կազմակերպված ապստամբությունների հավանական վտանգ կա»: Սա կապում են այդ տարածաշրջանում զարգացած ստվերային տնտեսության, ինչպես նաև կազմակերպված հանցավորության «համատարած ազդեցության» հետ:
Հրապարակման համաձայն, ստվերային տնտեսությունում աշխատում են Իտալիայի հարավային հատվածի շուրջ չորս միլիոն բնակիչներ, յուրաքանչյուր չորրորդն աշխատավարձ է ստանում կանխիկ գումարով և հարկեր չի վճարում: Այժմ նրանք փաստացի մնացել են առանց ապրուստի միջոցի: Ըստ իշխանությունների, մաֆիան պատրաստ է օգտվել ցանկացած նման իրավիճակից:
Սիցիլիայում և հարավային այլ շրջաններում արդեն իսկ հնչում են սուպերմարկետների թալանի կոչեր, փողոցներում հաճախակի են դարձել կողոպուտի դեպքերը, երբ անցորդներից գողանում են նոր գնված մթերքներով լի պայուսակները: Գրեթե ամեն օր հանձակումներ են տեղի ունենում դեղատների վրա, գրում է ABC-ն:
Պալերմոյում 20 հոգուց բաղկացած կազմակերպված խումբը «Մենք փող չունենք, բայց ուտել ենք ուզում» բղավոցներով փորձել է սննդով լի սայլակներով լքել խոշոր սուպերմարկետը: Խանութի աշխատակիցները ոստիկանություն են կանչել: Այժմ իրավապահ մարմինները վերահսկում են քաղաքի բոլոր սուպերմարկետները:
Պարբերականը մեջբերում է Պալերմոյի քաղաքապետի խոսքերը, որը հայտարարել է, որ կորոնավիրուսի հետ կապված ճգնաժամին «արժանապատվությամբ» դիմակայողների կողքին կան «շնագայլեր» և «արհեստավարժ ցուցարարներ», որոնք չեն թաքցնում իրենց կապը մաֆիայի հետ: Քաղաքապետը կոչ է արել նրանց մասին տեղեկացնել ոստիկանությանը: Ըստ ABC-ի, ապրիլի 3-ից հետո, երբ պետք է ավարտվեն կոշտ սահմանափակումները (այնուամենայնիվ, պարբերականը նշում է, որ դրանց ժամկետն, ամենայն հավանականությամբ, կերկարաձգվի), սոցցանցերում ընդվզման և «պատերազմի» կոչերով տեսանյութեր են տարածվում:
