Սահմանադրական հանրաքվեի առաջին շաբաթներին պասիվ քարոզարշավը ակնհայտորեն և բավական կտրուկ մտել է աշխույժ ռեժիմի մեջ՝ վարչապետ Փաշինյանի առաջնորդությամբ: Ինչով է պայմանավորված կտրուկ աշխուժացումը:
Անցնող օրերին ակնառու էր, որ առաջացել էին հարցեր, թե ինչու է կառավարությունը, կառավարող մեծամասնությունը պասիվ իր իսկ նախաձեռնած գործընթացի քարոզչական ժամանակահատվածում: Արդյոք դա պայմանավորվա՞ծ էր այն հանգամանքով, որ հենց կառավարության իսկ ներսում կային հարցեր և տարբեր սցենարային դիտարկումներ, թե գործընթացն ընդհանրապես ինչպիսի բնույթ, բովանդակություն, դինամիկա կարող է ունենալ, հնարավոր արդյունքի ինչպիսի հավանականություն կարող է ակնկալվել կամ դիտարկվել: Արդյոք տեղի՞ էր ունենում ռիսկերի և հնարավորությունների հարաբերակցության գնահատում, և այդ համատեքստում աշխուժացումը նշանակում է, որ առաջացել է ռիսկերին արագ հակազդելո՞ւ, թե՞ հակառակը՝ ինքնավստահ կերպով ԱՅՈ-ի համար աշխույժ պատասխանատվություն ստանձնելու համար պատկեր-նախադրյալ:
Հարցերն ու դիտարկումները կարող են անշուշտ տարբեր լինել, քանի որ ակնառու է, և այդ մասին խոսել ենք նաև բազմիցս, որ գործ ունենք բազմաշերտ և բավականին տարողունակ բովանդակությամբ քաղաքական գործընթացի հետ, որտեղ լոկ Սահմանադրական դատարանակազմի խնդիրը տարրերից մեկն է և լայն քաղաքական համատեքստի առումով ավելի շատ առիթ՝ մի շարք այլ ներքին ու արտաքին քաղաքական խնդիրներ սպասարկելու տեսանկյունից:
Եվ այստեղ թերևս արժե ուշադրություն դարձնել մի բավականին հետաքրքիր հանգամանքի վրա՝ ԱՅՈ քարոզչական բուկլետների ձևավորման կամ, ավելի շուտ, դրանցում առկա մի հանգամանքի, առերևույթ բավականին փոքր, սակայն թերևս առանցքային, հիմնարար և խորքային դետալի վրա: Բուկլետի ձևավորումը Հայաստանի Հանրապետության անձնագիրն է, որի վրա Հայաստանի և Արցախի միասնական քարտեզագրումն է:
Այդ դետալը արժանացել է քիչ ուշադրության, բայց թերևս ամենից շատն է արտահայտում այն խորքային տողատակը, որի հետ գործ ունի Հայաստանն ու հանրությունը Սահմանադրական դատարանի կազմի առիթով հանրաքվեի գործընթացում: Չէ՞ որ բուկլետը կարող էր պարունակել ամենատարբեր բնույթի այլ ձևավորում ու փաթեթավորում, անգամ եթե դրված լիներ զուտ անձնագրային կոնցեպտ: Չէ՞ որ Հայաստանի անձնագրի վրա քարտեզ չկա: Չէ՞ որ որևէ մեկը չէր ակնկալելու կամ պահանջելու այդպիսի նշագրում քարոզչական բուկլետի վրա:
