Ադրբեջանական ANS PRESS-ին տված հարցազրույցի ժամանակ Թուրքիայի «Ազգայնական շարժում» կուսակցության (ԱՇԿ) նորընտիր պատգամավոր Սինան Օղանն անդրադարձել է վերջին շրջանում Թուրքիայում «Քրդստանի աշխատավորական» կուսակցության (PKK) ակտիվացման դրդապատճառներին.
«PKK-ն ավելի շուտ կակտիվանար, սակայն իշխանությունները նրա հետ բանակցություններ էին վարում՝ չցանկանալով, որ այդ ակտիվացումը տեղի ունենար նախքան խորհրդարանական ընտրությունները։ Դա արվում էր կառավարության քաղաքական իմիջին հարված հասցնելուց խուսափելու համար։
PKK-ն նախկինում առաջ էր քաշել մի շարք նախապայմաններ՝ սպառնալով դրանց չիրագործման դեպքում հուլիսի 14-ից ակտիվանալ։ Ցավալի է այն փաստը, որ դրա պատճառով զոհվեցին 13 թուրք զինծառայողներ։
Մյուս կողմից էլ ոչ մեծաթիվ PKK ահաբեկչական կազմակերպությունը չի կարող իրեն ենթարկեցնել Թուրքիան, որն ունի «աշխարհի ամենահզոր» բանակը։ Դժբախտաբար, վերջին 8 տարիների ընթացքում PKK-ի դեմ բավականաչափ պայքար չի մղվել՝ փոխարենը տեղի են ունեցել բանակցություններ։
Դրա հետևանքով՝ վերջին շրջանում PKK-ն ավելի է ամրապնդվել և անգամ համարձակվել է նախապայմաններ դնել Թուրքիայի առջև։ Հավատացե՛ք, որ եթե PKK-ի դեմ ճիշտ և կոշտ պայքար մղվի, ապա Թուրքիան հաղթանակ կտանի։
ԱՄՆ պետքարտուղար Հիլարի Քլինթոնի թուրքական այցից առաջ PKK-ն 13 թուրք զինծառայողի սպանության միջոցով ցանկանում էր իր հզորությունը ցուցադրել թե՛ Թուրքիային, թե՛ ԱՄՆ-ին։ ԱՄՆ-ը վերահսկում է Իրաքը (որի հյուսիսային հատվածում գտնվում են PKK-ի ճամբարները), ԱՄՆ-ը համայն աշխարհում պայքարում է ահաբեկչության դեմ, սակայն դժբախտաբար նա չի պայքարում PKK-ի դեմ»։
Հիշեցնենք, որ նախորդ տարվա աշնանը թուրք հայտնի վերլուծաբան Մեհմեթ Ալի Բիրանդը հայտարարել էր, որ առանց ԱՄՆ աջակցության՝ PKK-ի դեմ Թուրքիայի պայքարը կստացվի շատ բարդ և արյունալի։
