Կառավարությունը լիզինգի ոլորտի զարգացմանը նպաստող օրենքի նախագիծ է մշակել։ Փետրվարի 13-ին կառավարության նիստում էկոնոմիկայի փոխնախարար Ավագ Ավանեսյանը նախագիծը ներկայացնելիս մասնավորապես հայտարարեց․
«Մենք կարգավորում ենք լիզինգի դաշտը և բացում ենք նոր հնարավորություններ լիզինգի ոլորտի զարգացման համար։ Մեր գնահատմամբ՝ տվյալ փաթեթի ընդունման արդյունքում լիզինգի ծավալները ՀՀ-ում կարող են աճել մինչև երկու անգամ։ Ներկա դրությամբ՝ Հայաստանում լիզինգի պայմանագրերը միշտ կնքվում են եռակողմ, տվյալ փաթեթի ընդունման արդյունքում հնարավոր կլինի երկկողմ լիզինգի պայմանագրերի կնքումը։ Սա թույլ կտա իրականացնել երկրորդային լիզինգի գործարքը»։
«Ապավեն» ընկերության գործադիր տնօրեն Գագիկ Աղաջանյանը դրական գնահատեց գործադիր մարմնի այս որոշումը՝ ընդգծելով, որ գործընթացի հեշտացումը կարող է խթանիչ գործոն դառնալ՝ լիզինգային գործարքների ավելացման համար։
«Շատ դեպքերում գաղափարը շատ լավն է լինում, վեհ է լինում, բայց միևնույն ժամանակ այդ գաղափարի կիրառման այնպիսի պայմաններ, այնպիսի մեխանիզմներ են դրվում, որ առաջ քաշված դրական փոփոխությունը լրիվ հակառակ էֆեկտն է ունենում․ հուսանք, որ կառավարությունն այս անգամ այդ ճանապարհով չի գնում և իրականում առավել դյուրին գործընթաց է նախատեսում լիզինգից օգտվել ցանկացողների համար»,- «Առաջին լրատվական»-ի հետ զրույցում շեշտեց Գագիկ Աղաջանյանն ու այս համատեքստում հավելեց․
«Ես, անկեղծ ասած, մի փոքր դժվար եմ պատկերացնում, թե ինչպես են անելու, որ եռակողմ պայմանագիրն այսուհետ երկկողմ կնքվի, որովհետև հիմա դրանք կնքվում են բանկի, վաճառողի և գնորդի միջև, բայց, եթե ինչ-որ տարբերակներ ունեն գործընթացի պարզեցման համար, ապա շատ լավ է, եթե սրան էլ ավելացնեն նաև երկրորդային շուկայից ձեռքբերման հնարավորությունը, ապա, լիզինգից օգտվողների քանակը, միանշանակ, կավելանա և դա շատ լավ է»։
Աղաջանյանի խոսքերով՝ լիզինգով որևէ ապրանք գնելու գործընթացում խնդիրներ որպես այդպիսի գրեթե չկան, պարզապես ի տարբերություն այլ նմանատիպ գործընթացների՝ այն մի փոքր ավելի ժամանակատար է, որովհետև բանկը բազմաթիվ փաստաթղթեր է պահանջում՝ գնորդի վճարունակության մեջ համոզվելու համար։
«600 հազար եվրո արժողությամբ չորս նոր բեռնատար ենք մենք հիմա ուզում լիզինգով գնել ու բանկը տարբեր տեղեկանքներ է պահանջում և դա շատ բնական է, որովհետև պետք է համոզված լինեն ում հետ են պայմանագիր կնքում․ ուզում եմ նշել, որ այստեղ շատ կարևոր է նաև կազմակերպության գործարար համբավը, վճարունակության մակարդակը և կոնկրետ, օրինակ, մեր ընկերության դեպքում՝ խնդիրներ չեն առաջանում, սակայն ոչ բոլոր կազմակերպություններն են, որ կարողանում են լիզինգի հնարավորությունից օգտվել կամ ավելի դժվար է դա նրանց տրվում, այսինքն՝ կան այլ կազմակերպություններ, որոնք ցանկանում են, բայց ինչ-ինչ խոչընդոտներից կամ խնդիրներից ելնելով՝ լիզինգի տարբերակից չեն օգտվում։
Առհասարակ, եթե լիզինգով ցածր տոկոսադրույքներ առաջարկեն, մարման երկար ժամկետ առաջարկեն, ապա կարծում եմ, որ շատերը կօգտվեն դրանից, իսկ ոմանց մոտ էլ վճարունակության ռիսկայնություն է բարձր, հետևաբար սա երկկողմանի հարց է։
Հիմա, եթե կառավարությունը համապատասխան որոշումներով կարողանա սահմանել այնպիսի մեխանիզմ, որով ավելի լայն շրջանակներ կարողանան լիզինգից օգտվել, ուրեմն գովասանքի արժանի կլինեն, քանի որ դա շատ մեծ հնարավորություն է ընձեռում հատկապես շինարարական, տրանսպորտային և մի քանի այլ նման ոլորտներով զբաղվող կազմակերպությունների համար»,- եզրափակեց մեր զրուցակիցը։
Նշենք նաև, որ ներկայացված օրենքի նախագծի փաթեթն առաջիկայում կքննարկվի նաև Ազգային Ժողովում։